2050 jylǵa qaraı álem halqynyń 70 paıyzy megapolısterde turady – boljam
BAKÝ. QazAqparat - 2050 jylǵa qaraı álem halqynyń 70% - y qalalarda turady, 2020 jyly bul kórsetkish 54% bolǵan. Oǵan deıin 213 mıllıon halqy bar 14 megapolıs qala paıda bolady. Bul týraly Ekonomıka jáne beıbitshilik ınstıtýtynyń jańa baıandamasynda aıtylǵan, dep habarlaıdy QazAqparat Statista-ǵa silteme jasap.
Basylym bul ósim halyq sanynyń artýyna jáne 10 mıllıon nemese odan da kóp halyqtyń megapolısterge aýysý ýrbanızatsııasymen baılanysty dep málimdeıdi.
Ýrbanızatsııa eriksiz ketý nemese qalaǵa tartý faktorlarynyń áserinen bolady. Birinshisi zorlyq-zombylyq, qaýipsizdik, ekologııalyq jaǵdaıdyń nasharlaýy jáne adamdar úshin qoljetimdi aýylsharýashylyq jerleriniń shektelýinen.
Sonymen qatar ómir súrý deńgeıiniń joǵarylyǵy qalaǵa tartý faktory bolýy múmkin. Atap aıtqanda, qalalardaǵy halyq sanynyń ósýimen qatar, ekonomıkalyq ósim de bolýy yqtımal.
AXA ınvestıtsııalyq kompanııasynyń málimeti boıynsha, Fılıppındegi Manıla men Úndistandaǵy Bangalorda onjyldyqtyń sońyna qaraı jalpy ishki ónim shamamen 150% ósedi degen boljam jasaldy.
Basylym qazir álemde 33 megapolıs bar ekenin habarlaıdy. Olardyń ishinde halqy eń kóp Tokıo (37,3 mıllıon), Delı (32,3 mıllıon), Shanhaı (28,7 mıllıon), Dakka (22,6 mıllıon), San-Paýlý (22,5 mıllıon) jáne Mehıko (22,1 mıllıon).
2050 jylǵa qaraı olardyń qataryna taǵy 14 qala qosylyp, jalpy halqy shamamen 213 mıllıon adamǵa artady. Osy ýaqytqa deıin Delı (49,6 mıllıon), Dakka (34,6 mıllıon), Tokıo (32,6 mıllıon), Kaır (32,6 mıllıon) jáne Mýmbaı (32,4 mıllıon) favorıtterdiń qataryna enip úlgeredi.
Pew Research Center zertteý ortalyǵynyń málimeti boıynsha, Afrıka júzjyldyq sońyna qaraı qalǵan aımaqtarda ósý qarqyny tómendeı bastaǵanda, halyq sanynyń aıtarlyqtaı ósýi saqtalyp qalǵan álemdegi jalǵyz aımaq bolýy múmkin.
Sonymen qatar tek úsh megapolıste ǵana halyq sany azaıady: Reseı astanasy Máskeýde (-3%), sondaı-aq Japonııanyń Osaka qalasynda (-12%) jáne Tokıoda (-12%).
Halqynyń qartaıý jáne týý deńgeıiniń tómendeýine baılanysty qysqarǵanyna qaramastan, Japonııa astanasy 2050 jyly áli de halqy eń kóp álemdegi tórtinshi qala bolady.
Derekkózderdiń ártúrli statıstıka berýi boljamdarǵa áser etedi. Mysaly, BUU bastapqyda Úndistan 2027 jyly Qytaıdy eń úlken el retinde basyp ozady dep boljasa, endi bul aǵymdaǵy jyldyń sáýir aıynda bolady dep kútilýde.
Megapolıs mártebesine keletin bolsaq, BUU-nyń 2018 jylǵy málimetteri boıynsha, Malaızııadaǵy Kýala-Lýmpýr men Qytaıdaǵy Ýhan sııaqty taǵy birneshe qalalar bul tizimge 2035 jylǵa deıin enedi.
Foto: Getty Iamges
