2050 jyldan keıin Eýropaǵa sý basý qaýpi tónip tur
ASTANA. QazAqparat - 21 ǵasyrdyń ekinshi jartysynan keıin Eýropa elderin sý basý qaýpi tónip tur. Mundaı qorytyndyǵa belgııalyq ǵalymdar kelip otyr.
Brıýssel Erkin ýnıversıtetiniń professory Jan-Paskal Van Iperseleniń paıymynsha, Ulybrıtanııanyń basyna úıirgen taıaýdaǵy tabıǵı apattar men osydan 35 jyldan keıin oryn alýy múmkin tabıǵı tosyn jaıttardyń arasynda tikeleı baılanys bar.
Sonymen qatar, ǵalymdar Atlantıkadaǵy jylymyq pen eýropalyq elderdegi jyly qys, mol jaýyn-shashyn jáne qurǵaq ári ystyq jazdyń arasyndaǵy baılanysty anyqtaǵan. Bul rette ǵalymdar Eýropanyń sý astyna ketýine mol túsken jaýyn-shashyn men álemdik muhıttardaǵy sý kóleminiń artýy yqpal etetindigine senimdi.
Sondyqtan da ǵalymdar birqatar elderdegi ekonomıkalyq ahýalǵa tikeleı áseri bolatyn oryn alýy múmkin tabıǵı ózgeristerge qazirden bastap daıyndalýǵa shaqyrýda.
«Qazirdiń ózinde Ulybrıtanııa sumdyq jaǵdaımen betpe-bet kelip otyr. Sý tasqyny men daýyldyń saldarynan eki adam qaza tapty. Memlekettiń ońtústik-batys bóliginde tabıǵı apat týrasynda habarlandyrý taratyldy ári jaǵdaıdyń jaqsarǵandyǵy baıqalar emes», - delingen Vladtime.ru saıtynda.
