2050 jyly qaterli isikten bolatyn ólim 75%-ǵa artýy múmkin

ASTANA. KAZINFORM — Ǵalymdardyń boljamy boıynsha, 2050 jylǵa qaraı álemde qaterli isikten bolatyn ólim-jitim sany 75%-ǵa artýy múmkin, dep jazdy DW.

The Lancet medıtsınalyq jýrnalynda jarııalanǵan zertteýge sáıkes, 2050 jylǵa qaraı qaterli isikten qaıtys bolatyn adamdar sany 18,6 mıllıonǵa, al jyl saıyn anyqtalatyn jańa onkologııalyq jaǵdaılar sany 30,5 mıllıonǵa deıin jetýi múmkin.

Zertteýshilerdiń aıtýynsha, bul jaǵdaıdan eń kóp zardap shegetin — tabysy tómen elder. Aldaǵy 25 jylda bul memleketterde barlyq jańa aýrý jaǵdaılarynyń jartysynan astamy jáne ólim-jitimniń eki úshten biri tirkeledi dep boljanǵan. 

1990 jyldan 2023 jylǵa deıin júrgizilgen zertteý aıasynda qaterli isiktiń 47 túri qarastyrylǵan. Ǵalymdar búgingi kúni onkologııalyq ólim-jitimniń 40%-dan astamy temeki shegý, durys tamaqtanbaý jáne qandaǵy qant deńgeıiniń joǵary bolýy sııaqty ózgertýge bolatyn 44 qaýip faktorynyń áserinen bolyp jatqanyn atap ótti.

Sarapshylar ahýaldy jaqsartý úshin, ásirese tabysy tómen elderde, qaterli isikti erte jáne dál anyqtaý, sapaly emdeý men qoldaýshy kútimge qoljetimdilikti arttyrý qajet ekenin aıtty.

Al Qazaqstanda onkologııalyq tekseristen kimder tegin ótýge bolatynyn myna siltemeden oqı alasyz.