2050 jylǵa qaraı Soltústikte adam sany 1 mıllıonǵa azaıýy múmkin – depýtat

ASTANA. KAZINFORM – Senat depýtaty, Parlament Senatynyń Áleýmettik-mádenı damý jáne ǵylym komıtetiniń múshesi Ásem Rahmetova elimizdiń demografııalyq jáne kóshi-qon máselelerine alańdatýshylyq tanytty.

«Taǵy bir ózekti másele – elimizdiń geografııalyq ár alýandyǵyna baılanysty halyqtyń qonystaný tyǵyzdyǵynyń teńsizdigi men ishki kóshi-qonnyń rettelmeýi bolyp otyr. Sońǵy derekterge súıensek Astana, Almaty, Shymkent sııaqty iri qalalar, sondaı-aq aglomeratsııalar negizgi kóshi-qon aǵynyn tartyp otyr. Al olardyń ınfraqurylymy oǵan tótep bere almaýda», - dedi Ásem Rahmetova Senatta ótken Úkimet saǵatynda.

Halyq qalaýlysy keltirgen málimetke sáıkes, 2050 jylǵa qaraı eldiń ońtústik óńirlerinde halyq sany 5,2 mıllıonǵa artyp, soltústikte 1 mıllıon adamǵa azaıýy múmkin.

«Óńiraralyq erekshelikke sáıkes ońtústik aımaq – týý kórsetkishiniń joǵarylyǵymen, halyqtyń qonystanýynyń tyǵyzdyǵymen, jer resýrstarynyń tapshylyǵymen, jumys kúshiniń jyl saıynǵy artýymen erekshelenedi (2023 jylǵy 1 toqsanda ońtústik óńirlerdegi jumyssyzdyq deńgeıi 5% bolǵan). Kerisinshe soltústik aımaq – halyqtyń tyǵyzdyǵynyń tómendigi, eńbekke qabiletti jastardyń óńirden ketýi, qartaıý úrdisi, týý men ekonomıkalyq belsendiliktiń quldyraýymen erekshelenip otyr», - deıdi ol.

Onyń aıtýynsha, eldiń damý perspektıkasyna ishki kóshi-qonnyń qazirgi tendentsııasy qolaısyz.