2050 jylǵa qaraı Qazaqstan halqynyń sany 26,5 mln bolady

ASTANA. KAZINFORM — Shamamen 10,3 mlrd adam. BUU jańa boljamy boıynsha 2080 jyldardyń ortasyna qaraı Jer halqynyń sany osynsha bolady. Al 2100 jylǵa qaraı bul kórsetkish 10,2 mlrd-qa deıin tómendeıdi, delingen uıymnyń jańa baıandamasynda.

Birinshi kredıt bıýrosy BUU baıandamasyna taldaý jasaı otyryp, keı memleketterde halyq sany 2024 jylǵa qaraı eń joǵary deńgeıge jetkenin, alaıda osydan bastap ondaǵy adam sany birtindep azaıatynyn aıtady. Ondaı elderdiń ishinde mysaly, kórshilerimiz Reseı men Qytaı bar.

Bul úrdis týý kórsetkishiniń tómendeýine baılanysty. Kóshi-qonsyz halyqtyń turaqty sanyn ustap turý úshin bir áıelge shaqqandaǵy týý kórsetkishi 2,1-den tómen bolmaýy kerek, al álem elderi men aımaqtarynyń shamamen 20 paıyzynda bul meje qazir — bir áıelge 1,4-ten tómen.

Degenmen Qazaqstanda dál osy koeffıtsıent qazir 3-ke jaqyn, al bolashaqta halyq sany tek kóbeıe beredi. 

BUU medıandyq baǵalaýy boıynsha qazaqstandyqtardyń sany 2050 jylǵa qaraı — shamamen 26,5 mln, 2100 jylǵa qaraı — 33,7 mln bolady. 

Qazir, 2024 jyly BUU eseptegendeı, bizde ómir súrý uzaqtyǵy — 74,5 jyl, bul jahandyq deńgeıden joǵary (73,3 jas). 

Jalpy, bul kórsetkish bizde de, álemde de ósip jatyr: mysaly 30 jyl buryn ol — 64,1 jas, jahandyq deńgeıde — 64,3 jas bolatyn.

Jasy kelip qartaıyp ómirden ótetinderdiń sany kóbeıdi.  

1995 jyly dúnıe júzindegi ólim-jitimniń tek 17 paıyzy 80 jastan asqan qarttarǵa tıesili edi. 

2024 jyly bul úles 29% jetti, al 2050 jyldardyń aıaǵynda 50%-dan asady.