2045 jylǵa qaraı Germanııada halyq sany kúrt qysqarýy múmkin

ASTANA. KAZINFORM — Germanııanyń Ekonomıka ınstıtýty 2045 jylǵa qaraı el halqy 81 mln-ǵa deıin qysqarýy múmkin ekenin boljady, dep habarlaıdy BILD.

Germanııanyń Ekonomıka ınstıtýty málimetinshe, Germanııa halqy 2025 jyly shamamen 100 myń adamǵa azaıyp, 83,5 mln adam bolady. Bul 2010 jyldan beri alǵash ret tirkelgen aıtarlyqtaı tómendeý (2020 jylǵy pandemııa jylyn eseptemegende).

Instıtýt muny kóshi-qonnyń endi halyqtyń tabıǵı azaıýyn óteı almaýymen túsindiredi.

Baǵalaýǵa sáıkes, 2025 jyly elge kelgender sany ketkenderden nebári 250 myń adamǵa ǵana kóp bolǵan. Al qaıtys bolǵandar sany týǵandardan 350 myńǵa artyq bolǵan. Saldarynan Germanııa halqynyń jalpy sany azaıǵan.

Eger bul úrdis saqtalsa, 2045 jylǵa qaraı el halqy taǵy 2,9%-ǵa qysqaryp, 81,1 mln adamǵa deıin tómendeýi múmkin.

Sarapshylar kóshi-qon odan ári álsiregen jaǵdaıda halyq sany tipti 78 mln-ǵa deıin azaıýy yqtımal ekenin eskertedi. Bul, olardyń pikirinshe, eńbek naryǵyna, zeınetaqy júıesine jáne áleýmettik saqtandyrý júıesine túsetin júktemeni arttyrady.

Osyǵan baılanysty ekonomıster bılikti shetelden bilikti mamandardy belsendirek tartýǵa jáne sheteldik dıplomdardy taný rásimin jedeldetýge shaqyrady.

Aıta ketelik Germanııanyń ushqyshtar kásipodaǵy eki kúndik ereýil jarııalaǵan edi.