2040 jylǵa qaraı Qazaqstandaǵy sý tapshylyǵy 12 tekshe shaqyrymdy quraýy múmkin -Myrzaǵalıev

NUR-SULTAN. QazAqparat - 2040 jylǵa qaraı Qazaqstandaǵy sý tapshylyǵy 12 tekshe shaqyrymdy quraýy múmkin. Bul týraly búgin Úkimet otyrysynda QR Ekologııa, geologııa jáne tabıǵı resýrstar mınıstri Maǵzum Myrzaǵalıev aıtty, dep habarlaıdy QazAqparat tilshisi.

«Elbasy Nursultan Nazarbaevtyń Qaýipsizdik keńesiniń otyrysynda bergen tapsyrmasyna jáne QR Prezıdenti Qasym-Jomart Toqaevtyń Úkimettiń keńeıtilgen otyrysynda aıtylǵan tapsyrmasyna sáıkes, sý resýrstaryn basqarýdyń 2020-2030 jyldarǵa arnalǵan memlekettik baǵdarlamasynyń tujyrymdamasy ázirlendi. Eldi sýmen qamtamasyz etý problemasy bárimizge málim. Halyqaralyq sarapshylardyń qorytyndysy boıynsha Qazaqstandaǵy sý tutyný kólemi 2040 jylǵa qaraı 56 paıyzǵa ósedi jáne jyl saıynǵy sý tapshylyǵy 12 shekshe shaqyrymdy quraýy múmin», - dedi ol.

Mınıstrdiń dereginshe, sý tapshylyǵy negizinen kórshi memleketterden keletin sý kóleminiń azaıýyna baılanysty oryn alady.

«Osyǵan oraı, mınıstrlik sizderdiń nazarlaryńyzǵa Qazaqstannyń sý resýrstaryn basqarýdyń 2020-2030 jyldarǵa arnalǵan baǵdarlamasynyń tujyrymdamasyn usynyp otyr. Eldiń jyl saıynǵy jerústi sý qory 100 tekshe shaqyrymnan asa kólemdi quraıdy. Onyń 46 tekshe shaqyrymy nemese 46 paıyzy Qazaqstannan tys jerlerde qalyptasady. Sonymen qatar jerasty sý áleýeti jylyna 15 tekshe shaqyrymdy qurap otyr», - dedi Maǵzum Myrzaǵalıev.

Onyń atap ótýinshe, jalpy 100 tekshe shaqyrymnyń 50 tekshe shaqyrymy ekologııalyq tepe-teńdikti saqtaý úshin qajet. 24 tekshe shaqyrymǵa jýyǵy ekonomıkada qoldanylady. Onyń ishinde, 16 tekshe shaqyrymy aýyl sharýashylyǵynda, 7 tekshe shaqyrymy ónerkásipte jáne 1 tekshe shaqyrymy sharýashylyq-turmystyq qajettilikter úshin paıdalanylady.

«Dúnıejúzilik resýrstar ınstıtýtynyń baǵalaýy boıynsha Ortalyq Azııa elderi sý tapshylyǵy joǵarǵy elder qataryna jatady. Al, Qazaqstan bolsa, ortasha-joǵary qatarǵa kiredi»,- dedi mınıstr.