2040 jylǵa qaraı Qazaqstanda sý resýrstaryna suranys jylyna 25 mlrd tekshe metrge deıin artady - sarapshylardyń baǵalaýy
ASTANA. 24 jeltoqsan. QazAqparat - Sarapshylardyń uzaq merzimdi boljaýyna sáıkes 2040 jylǵa qaraı sý resýrstaryna suranys Qazaqstanda 56% artyp, jylyna shamaman 25 mlrd tekshe metrdi quraıdy,
dep habarlady búgin QR qorshaǵan orta jáne sý resýrstary mınıstri Nurlan Qapparov Úkimet otyrysynda.
«2040 jylǵa qaraı sý men sý tutynýǵa suranys jalpy Qazaqstan boıynsha 56% artyp, qazirgi 16 mlrd. tekshe metrmen salystyrǵanda jylyna 25 mlrd. tekshe metrdi quraıdy», - dedi N.Qapparov.
Vedomstvo basshysynyń aıtýynsha, ósýdiń atalǵan boljamy boljanǵan merzimde halyq sanynyń 20,8 mln adamǵa deıin artýynyń negizinde qalyptastyrylǵan. Sondaı-aq, ol atap ótkendeı, jylyna sý tutyný jan basyna shaqqanda orta eseppen alǵanda 1,9 % dınamıkamen ósip otyrady.
Ónerkásiptik sektorǵa keletin bolsaq, N.Qapparovtyń málimetinshe, munda sý tutyný kólemderiniń ósýi 2040 jylǵa qaraı shamamen 35%-dy quraıdy, bul ónerkásiptik óndiristiń jylyna 4% kólemde artýyna sáıkes. Sý tutynýdyń eń joǵary ósýi munaı men gaz shyǵarý jáne óńdeý, taý-ken ónerkásibinde jáne elektr energııasyn óndirý salasynda baıqalady.
Budan ózge, qorshaǵan ortany qorǵaý vedomstvosy málimdegendeı, aýyl sharýashylyǵynda turaqty sýarý aýdanyn 2040 jylǵa qaraı 2,1 mln ga deıin keńeıtý kútilýde, bul sáıkesinshe sý tutynýdyń jylyna 1,6%-ǵa ósýine alyp keledi, dep habarlady primeminister.kz .
