2040 jyly Túrkistan qalasynyń halqy 400 myńǵa jetedi

TÚRKІSTAN. KAZINFORM- Búgin Túrkistan qalasynyń Bas josparyna ózgertýler men tolyqtyrýlar engizý máselesi talqylandy.

Jıynda Bas jospardyń jobasy tanystyryldy. Onda shahardyń 2040 jylǵa deıingi damý jospary belgilengen. Qalanyń ınfraqurylymyn jaqsartý, týrızm salasyn damytý, tarıhı oryndar men eskertkishterdi saqtaýǵa basymdyq berilgen. Sonymen birge qalanyń árbir sektoryn damytý, áleýmettik nysandarmen qamtý, jylý jáne sý júıeleriniń áleýetin halyq sanyna saı kezeń-kezeńimen kóterý, shahardaǵy avtomobıl joldaryn ońtaılandyrý jáne ózge de máseleler qamtylǵan. 2040 jyly Túrkistan qalasy turǵyndarynyń sany 400 myńǵa jetedi dep boljanyp, qalanyń Bas jospary soǵan saı tolyqtyrylǵan. 

Óńir basshysy Bas jospardy zerdelep, tolyqtyrýdy tapsyrdy. Sala basshylarymen aqyldasyp, jan-jaqty talqylaý kerektigin, usynystardy jetildirý mańyzdy ekenin jetkizdi. 

– Memleket basshysynyń bastamasymen Túrkistan qalasyna erekshe mártebe berý týraly Zań jobasy ázirlendi. Ol nazarǵa alynýy tıis. Ekinshiden, Túrkistan oblystyń ǵana emes, Túrki áleminiń ortalyǵy ekenin nazarda ustańyzdar. Bas jospar men qalanyń dızaın-kody zaman talabyna saı ári iri aglorematsııa deńgeıine kóteretindeı sapaly bolýy tıis. Qaıta qarap shyǵyp, naqty usynystar engizińizder, – dedi Nuralhan Kósherov. 

Sáýlettik jobalar talqylanǵan májiliste oblys aýmaǵyndaǵy aýdan, qala ortalyqtarynyń dızaın-kodyn ázirleý, eldi mekenderdiń sáýletin jaqsartý, «Birkólik» rekreatsııalyq aımaǵyn retteý máseleleri de aıtyldy. Bul jóninde Túrkistan oblysynyń sáýlet jáne qala qurylysy basqarmasynyń basshysy Nurlyjan Býkebaevtyń esebi tyńdaldy. Salaǵa jaýapty basshylarǵa tıisti tapsyrmalar berildi. Usynystar zerdelenip, qaıta qaralatyn boldy. 

Aıta keteıik, budan buryn Túrkistanda birqatar nysannyń qurylysy iske asatynyn jazǵan bolatynbyz.