2040 jylǵa qaraı Qazaqstanda talapkerler sany eki ese ósedi
ASTANA. KAZINFORM — Qazaqstanda kadrlardy daıarlaý máselesi boıynsha aýdıt júrgizildi. Bul týraly Májilis tóraǵasynyń orynbasary Danııa Espaeva málim etti.
— Joǵary bilim berý júıesine demografııalyq júktemeniń artyp keledi. Týý kórsetkishiniń turaqty ósýi jónindegi boljamdarǵa sáıkes, 2040 jylǵa qaraı talapkerler sany eki esege ósip, tórt júz qyryq myńnan asady, — dedi Danııa Espaeva Parlament Májilisinde joǵary bilimdi kadrlardy daıarlaý taqyrybyna arnalǵan Úkimet saǵatynda.
Sonymen qatar ol oqý josparlaryn jańǵyrtý jetkiliksiz ekenin aıtyp, oqytýshylardyń oqytý tásilderin qaıta qarastyryp, zamanaýı tehnologııalar men ádisterdi meńgerýi qajet ekenin sóz etti.
— Olardyń oılaý júıesiniń transformatsııasy — joǵary bilim berýdi jańartýdyń negizgi sharty. Osyǵan baılanysty professorlyq-oqytýshylyq quramdy jasandy ıntellektini tıimdi paıdalanýǵa daıyndaý basty mindetke aınalyp otyr, — dedi depýtat.
Sonymen qatar ol jastardyń ınjenerlik mamandyqtardy tańdaýǵa degen motıvatsııasy tómen ekenin atap ótti. Talapkerlerdiń bir bóligi grant alý úshin ǵana túsip, bolashaǵyn ınjenerlik mamandyqpen baılanystyrmaıdy. Bul jaǵdaıda bólinetin resýrstar suranysqa ıe ınjenerlik kadrlardyń qalyptasýyna ákelmeıdi, al granttardy bólý júıesiniń ózi ekonomıkanyń basym salalarynda túlekterdi sanaly túrde tańdaýdy jáne bekitýdi yntalandyrmaıdy.
— Kadrlardy daıarlaý máselesi boıynsha aýdıt júrgizildi, ol osy saladaǵy birqatar ótkir júıelik problemany anyqtady, olar týraly búgin sizderge Joǵary aýdıt palatasynyń múshesi habarlaıdy, — dedi Májilis tóraǵasynyń orynbasary.
Budan buryn habarlanǵandaı, 2035 jylǵa qaraı Qazaqstanda 562 kásip nemese eńbek naryǵynyń 44%-y (shamamen 4 mln adam) jasandy ıntellektiniń yqpalymen ózgerýi múmkin.
