2036 jylǵy jazǵy Olımpıada oıyndaryn ótkizýge jeti el úmitker
ASTANA. KAZINFORM — Germanııa, Vengrııa, Úndistan, Katar, Koreıa Respýblıkasy, Ońtústik Afrıka Respýblıkasy jáne Túrkııa 2036 jylǵy jazǵy Olımpıada oıyndaryn ótkizý boıynsha Halyqaralyq Olımpıada komıtetimen kelissóz júrgizip keledi, dep habarlaıdy Kazinform agenttiginiń menshikti tilshisi.
HOK 6 qazan kúni úmitkerler tizimin jáne áleýetti uıymdastyrýshylarǵa arnalǵan nusqaýlyqtardy jarııalady.
Basqa elderdiń ulttyq olımpıada komıtetteri de qyzyǵýshylyq tanytyp jatsa, 2026 jyldyń 31 qazanyna deıin HOK-tyń esigi ashyq.
Qarasha aıynda úmitker elder óz jobalaryn HOK komıssııasyna usynady.
2027 jyldyń naýryz aıynda Atqarýshy komıtet qysqa tizimdi bekitip, strategııalyq dıalog kezeńin bastaıdy.
Tizimniń ishinen basymdyq beriletin úmitkerler 2028 jyldyń sońyna deıin iriktelip, sońǵy sheshimdi HOK músheleri 2029 jyldyń ortasynda daýys berý arqyly qabyldaıdy.
Іrikteý qaǵıdattaryn Atqarýshy keńes maquldap, «Fit for the Future» reformasy aıasynda 2026 jyldyń maýsym aıynda Lozannada ótken HOK-tyń 146-shy sessııasynda bekitildi.
Jobalar arenalardyń bas jospary men sportshylarǵa jasalatyn jaǵdaılarǵa, qarjylandyrý kózderine, saıası jáne qoǵamdyq qoldaýǵa, Oıyndarǵa daıyndyq jáne mura strategııasyna negizdelip baǵalanady.
Úndistan Ahmedabadty usynady. Úndi eli Olımpıadaǵa alǵash ret ótinim berip otyr. Qatar Dohada ótkizgisi keledi. El astanasy fýtboldan 2022 jylǵy álem chempıonatyn ótkizip, tájirıbe jınaqtaǵan, biraq jazdyń aptap ystyǵyna baılanysty ádettegideı shilde jáne tamyzda emes, salqyn aılarda ótkizýge týra kelýi múmkin.
Germanııanyń namysyn 1972 jylǵy Oıyndardyń qojaıyny Mıýnhen qorǵamaq. Ońtústik Koreıa 1988 jylǵy jazǵy Oıyndardy ótkizgen Seýldi usynyp otyr.
Ońtústik Afrıka Keıptaýnǵa arqa súıep, Olımpıada oıyndaryn ótkizgen alǵashqy afrıkalyq el bolǵysy keledi.
Vengrııa Býdapeshti, al Túrkııa buryn da birneshe ret ótinim bergen Stambuldy usynyp otyr.
Keıbir ulttyq komıtetter HOK-pen 2036 jyldan keıin, sonyń ishinde 2040 jáne 2044 jyldary oıyndardy ótkizý múmkindigi jóninde kelissóz júrgizip jatyr.
Qazirgi ýaqytta aldaǵy tórt Olımpıadanyń qojaıyny belgili: 2028 jyly Los-Andjeles, 2030 jyly Frantsııanyń Alpi taýlaryndaǵy qalalary, 2032 jyly Aýstralııanyń Brısben qalasy, al 2034 jyly AQSh-tyń ıÝta shtaty qabyldaıdy.
— Oıyndar qaı jerde ótse de, bir nárse ózgermeýi kerek: bizdiń barlyq jumysymyzdyń qaq ortasynda sportshylar bolsyn, — dedi HOK prezıdenti Kırstı Koventrı.
Buǵan deıin Berlın 2036 jylǵy Olımpıadany ótkizýge úmitker bolýdan bas tartatynyn, sondaı-aq Mıýnhen Germanııanyń jazǵy Olımpıada oıyndaryn ótkizýge úmitkeri atanǵanyn habarlaǵan edik.
