2036 jylǵy Olımpıada oıyndaryn ótkizýge ótinim qabyldaý aıaqtaldy
ASTANA. KAZINFORM — Germanııa, Vengrııa, Úndistan, Qatar, Ońtústik Koreıa, Ońtústik Afrıka Respýblıkasy jáne Túrkııa 2036 jylǵy Olımpıada oıyndaryn ótkizýge nıetti. Bul týraly Halyqaralyq Olımpıada komıteti (HOK) kúni málimdedi, dep habarlaıdy Xinhua.
Elder tizimi 6 qazanda jarııalanǵan alǵashqy málimdememen salystyrǵanda ózgermegen. 31 qazanda aıaqtalǵan ótinim qabyldaý merzimine deıin basqa birde-bir eldiń ulttyq olımpıada komıteti qyzyǵýshylyq bildirmedi.
— Bul — «Bolashaqqa daıyndyq» baǵdarlamasy aıasynda engizilgen ózgeristerge sáıkes tańdalatyn alǵashqy Olımpıada oıyndary, — dedi HOK múshesi ári Olımpıadany ótkizýge laıyqty qalany tańdaý jónindegi komıssııa tóraıymy Kolında Grabar-Kıtarovıch.
Onyń aıtýynsha, 2036 jylǵy Olımpıadany ótkizýge kóptegen eldiń qyzyǵýshylyq tanytýy álem memleketteriniń bul oıyndardyń jergilikti qoǵamdastyq úshin áleýmettik jáne ekonomıkalyq mańyzyn moıyndaıtynyn kórsetedi.
Grabar-Kıtarovıch HOK aldaǵy ýaqytta Olımpıadany ótkizý jónindegi usynystaryn ázirleý barysynda atalǵan 7 tarappen de yntymaqtastyqty jalǵastyratynyn aıtty.
Aıta keteıik, 2032 jylǵy Olımpıada jáne Paralımpıada oıyndarynyń resmı emblemasy tanystyryldy.
