2036 jylǵy Olımpıada Mıýnhende ótýi múmkin

ASTANA. KAZINFORM — Aldyn ala berilgen daýys sanynyń qorytyndysy boıynsha, Bavarııa astanasynyń turǵyndarynyń basym bóligi qalada Olımpıada jáne Paralımpıada oıyndaryn ótkizý ıdeıasyn qoldap daýys bergen. Bul týraly DW jazdy.

Berlın ýaqytymen saǵat 20:21-de 364 saılaý ýchaskesiniń 345-inde daýystar sanalǵan. Nátıjesinde «ıá» dep jaýap bergenderdiń sany «qarsy» bolǵandardan eki ese kóp ekeni belgili boldy. 284 myń adam qoldap baýys berse, 144 myń adam qarsy ekenin bildirgen.

Süddeutsche Zeitung gazetiniń habarlaýynsha, daýys berý belsendiligi (38,5%) Mıýnhen tarıhyndaǵy rekordtyq deńgeıge jetti. Buǵan deıingi rekord 2001 jyly tirkelgen bolatyn, sol kezde qala turǵyndary Frettmanıng aýdanynda jańa stadıon salý máselesine qatysty referendýmǵa qatysyp, 37,5% kórsetkishke jetken edi.

Nemis Olımpıadalyq sport konfederatsııasy (DOSB) 2026 jyly ǵana Germanııanyń Olımpıada ótkizýge resmı ótinim beretin-bermeıtini týraly sheshim qabyldaıdy, dep habarlaıdy dpa agenttigi. Sonymen qatar, Olımpıadany ótkizý orny retinde Berlın, Gambýrg nemese Reın-Rýr aımaǵy da qarastyrylýy múmkin.

Gambýrg bıligi óz qalasyndaǵy Olımpıada ótkizý máselesine qatysty referendýmdy 2026 jylǵy 31 mamyrǵa belgilegen.

Aıta keteıik, jazǵy Olımpıada Mıýnhende bir ret — 1972 jyly ótken. Alaıda ol oıyndar palestınalyq lańkestik uıymnyń teraktisimen este qalǵan: sol oqıǵada 11 ızraıldik sportshy men bir batysgermanııalyq polıtseı qaza tapqan edi.

Aıta keteıik, Qatar 2036 jylǵy Olımpıadany ótkizýge ótinim berdi.