2036 jylǵa qaraı «Roskosmos» aıda elektr stantsııasyn salýdy josparlap otyr
MÁSKEÝ.KAZINFORM - «Roskosmos» 2036 jylǵa deıin Reseıdiń aıdaǵy elektr stantsııasyn qurý boıynsha jumystardy oryndaý úshin Lavochkın atyndaǵy ǴÓB-men memlekettik kelisimshart jasasqany týraly málimdedi. Kelisimshartty iske asyrý merzimi – 2025-2036 jyldar, dep habarlaıdy agenttiktiń menshikti tilshisi.
Aı elektr stantsııasynyń maqsaty — Reseıdiń Aı baǵdarlamasynyń tutynýshylaryn jáne Halyqaralyq ǵylymı aı stantsııasynyń ınfraqurylym nysandaryn uzaq merzimdi energııamen qamtamasyz etý. Atap aıtqanda, aı ústinde júretin kólikter, observatorııa, sondaı-aq sheteldik seriktesterdiń nysandary.
Aıta keteıik, «Lavochkın atyndaǵy ǴÓB» AQ — irgeli ǵylymı, astrofızıkalyq, planetalyq zertteýler júrgizýge, sondaı-aq Jerdi qashyqtan zondtaýǵa arnalǵan avtomatty ǵaryshtyq keshender men júıelerdi ázirleý, óndirý jáne praktıkalyq qoldanýmen aınalysatyn zymyran-ǵarysh ónerkásibi uıymy. Sonymen qatar ǵarysh apparattaryn eseptik okolozemdik orbıtalarǵa jáne Jerden ushyp shyǵý traektorııalaryna shyǵarý úshin údetkish bloktardy ázirleıdi.
Sondaı-aq joba aıasynda ǵarysh apparattaryn ázirleý, jerústi-eksperımenttik synaqtar, ushý synaqtary, sondaı-aq Aıda ınfraqurylymdy ornalastyrý jumystary júrgiziletini habarlandy.
Memlekettik korporatsııada bul joba turaqty jumys isteıtin ǵylymı Aı stantsııasyn qurý jolyndaǵy mańyzdy qadam ári bir rettik mıssııalardan Aıdy uzaq merzimdi zertteý baǵdarlamasyna kóshý ekenin atap ótti.
Jobaǵa «Roskosmospen» qatar «Rosatom» jáne Kýrchatov ınstıtýty da qatysady.
Buǵan deıin Qazaqstan KazSat-3 spýtnıgin jańa serikke aýystyrýǵa daıyndalyp jatqany jazylǵan edi.