2035 jylǵa qaraı Izraılde bir jarym mıllıonnan astam qarttar turady
ASTANA. QazAqparat - Izraıldiń gerontologııalyq qoǵamy keltirgen málimet boıynsha, qazirgi kezde elde jasy 65-ten asqan 833 000 adam turady, dep habarlady NEWSru Izraıl saıty.
Olardyń esebinshe, zamanaýı dári-dármekterdiń, salaýatty ómir saltynyń jáne qorshaǵan ortany qorǵaýdyń arqasynda 2035 jylǵa qaraı qart adamdardyń sany eki ese ósip, 1,64 mln. adamǵa jetedi. Bul týraly 8 maýsym kúni The Jerusalem Post gazeti jazyp otyr.
«Halyqtyń bul jiginiń ulǵaıýy arta túsedi, qarqyny shapshańdaı túsedi - jáne bul úderis demografııaǵa ǵana emes, sondaı-aq eldiń saıasaty men ekonomıkasyna jáne azamattardyń ál-aýqatyna da áser etedi», deıdi Ben-Gýrıon ýnıversıtetiniń gerontologııa professory Ester Lekovıch.
Gerontologııa qoǵamy Izraıl úkimetiniń basshysy Bınıamın Netanıahýǵa osy problema boıynsha tolyq aýqymdy esep usyndy jáne ony qart adamdarǵa kómek berýdiń ulttyq baǵdarlamasyn qalyptastyrý mindetimen aınalysatyn memlekettik komıssııa qurýǵa shaqyrdy.
Sarapshylardyń málimetteri boıynsha, búginde kóptegen qarttar qaıyrshylyqta, aýrý jáne jalǵyzdyq jaǵdaıynda ómir súrýde, al densaýlyǵy jaqsy, jan-jaqty qamtylǵan adamdar olardyń demalysyn uıymdastyrýǵa jáne áleýmettik ispen aınalysýǵa muqtaj.
