2035 jylǵa qaraı álem halqynyń jartysynan kóbi semizdikke shaldyǵady
SIDNEI. QazAqparat - Dúnıejúzilik semizdikpen kúres federatsııasy eger shara qoldanylmasa, 2035 jylǵa qaraı álem halqynyń jartysynan kóbi semizdikke shaldyǵatynyn eskertedi, dep habarlaıdy QazAqparat BBC News-ke silteme jasap.
Uıym esebine sáıkes, tórt mıllıardtan astam adam artyq salmaqtan zardap shegedi, al balalar arasynda qarqyn áldeqaıda joǵary bolady.
Esepte 2035 jylǵa qaraı semizdikpen kúresýge jumsalatyn shyǵyn jylyna 4 trln dollardan asady dep boljaıdy.
Federatsııa prezıdenti, professor Lýıza Baýr esep qorytyndysyn bolashaqta semizdik saldarymen betpe-bet kelmeý úshin elderge qazir áreket etý kerektigin tanytatyn «anyq eskertý» dep sıpattady.
Atap ótkende, baıandamada ásirese balalar men jasóspirimder arasynda semizdikke shaldyǵý deńgeıiniń joǵarylaýyna nazar aýdarylady. Bul kórsetkish uldar men qyzdarda 2020 jylǵy deńgeıden eki ese artady dep kútilýde.
Sondaı-aq, baıandamada álemde semizdikke eń kóp shaldyǵatyn 10 eldiń 9-y - Afrıka men Azııadaǵy tabysy tómen nemese ortadan tómen elder ekeni aıtylady.
