2035 jyly ekonomıkanyń elektr energııasyna qajettiligi tolyq qamtylady – Energetıka mınıstri
ASTANA. KAZINFORM – 2035 jylǵa qaraı el ekonomıkasynyń elektr energııasyna qajettiligi tolyq óteletin bolady. Bul týraly QR Energetıka mınıstri Erlan Aqkenjenov aıtty.
— Energetıkalyq qaýipsizdikti saqtaý, el ekonomıkasy men halqyn senimdi energııamen jabdyqtaý qajettiligin eskere otyryp, sondaı-aq elektr energııasyn tutynýdyń jyl saıynǵy ósýin eskere otyryp jańa energııa qýattaryn engizý jáne qoldanystaǵy elektr stantsııalaryn jańǵyrtýdy júzege asyrý kerek. Mınıstrlik eldegi tapshylyqty óteý jáne eksporttyq áleýetti arttyrý úshin 2035 jylǵa deıin qosymsha 26 GVt-tan astam jańa óndirýshi qýattardy engizýdi kózdeıtin elektr energııasy salasyn damytý jónindegi is-sharalar josparyn ázirledi. Osylaısha, ekonomıkanyń elektr energııasyna degen barlyq qajettiligi óteledi dep kútilýde, - dedi mınıstr Úkimet otyrysynda.
Onyń aıtýynsha, kómirtegi izin tómendetý baǵyty aıasynda balamaly energetıkany damytý jáne taza kómir tehnologııalary bazasynda kómir generatsııasyn odan ári damytý jumystary josparlanǵan.
— 33,6 mlrd. tonnany quraıtyn energetıkalyq kómirdiń rastalǵan orasan zor qory bola tura, qolda bar kómirmen jumys isteıtin energııa kózderinen tolyq bas tartý oryndy bolmaıdy. Osyǵan baılanysty, jańa kómir stantsııalaryn salý, sondaı-aq jumys istep turǵan kómir stantsııalaryn jańǵyrtý ekologııaǵa eń az áser ete otyryp, ekologııalyq talaptar men normalarǵa sáıkes keletin taza kómir tehnologııalaryna negizdeletin bolady. Mundaı jobalardyń aıqyn mysaly — Kókshetaý, Semeı jáne Óskemen qalalarynda júzege asyrylatyn jylý elektr ortalyqtary, sondaı-aq Kýrchatov jáne Ekibastuz qalalaryndaǵy iri elektr stantsııalary, - dedi ol.
Aıta keteıik, keshe Memleket basshysy Joldaýynda ekonomıkany tsıfrlyq turǵydan jańǵyrtý úshin elektr energııasy jetkilikti kólemde bolýy keregin eskertken bolatyn.