2035 jyly bıýdjet kirisi 66,8 trln teńgege deıin ulǵaıady — Serik Jumanǵarın

ASTANA. KAZINFORM — 2035 jyly memlekettik bıýdjettiń kirisi 66,8 trln teńgege deıin ulǵaısa, kepildendirilgen transfert 2029 jyldan bastap 2,0 trln teńgege deıin tómendeıdi.

Bul boljamdy Premer-mınıstrdiń orynbasary — Ulttyq ekonomıka mınıstri Serik Jumanǵarın jasap otyr.

— 2026–2035 jyldarǵa arnalǵan uzaq merzimdi damý boljamy. Qujat jańa bıýdjet kodeksin iske asyrý úshin ázirlendi. Boljam memlekettik josparlaý júıesi qujattarynyń qarjylyq qamtamasyz etilý kólemin aıqyndaıdy. Qujatta uzaq merzimdi damýdyń úsh nusqasy qaralǵan: ol bazalyq, qalypty jáne balama. Balama nusqadaǵy ekonomıkanyń 10 jyldaǵy ortasha ósý — 5,1%, qalyptyda — 4,3% deńgeıinde boljanady. Bazalyq nusqada 10 jyldaǵy ishinde jalpy ishki ónimniń ortasha jyldyq ósý 4,5%-dy quraıdy. Nomınaldy jalpy ishki ónim 2035 jyly 473,2 trln teńgege deıin ulǵaıady, — dedi Serik Jumanǵarın Úkimet otyrysynda.

Mınıstrdiń málimdeýinshe, 2026-2028 jyldarǵa arnalǵan bazalyq kórsetkishter áleýmettik-ekonomıkalyq damýdyń úsh jylǵa arnalǵan boljamyna sáıkes keledi.

— 2035 jyly memlekettik bıýdjettiń kirisi 66,8 trln teńgege deıin ulǵaıady. Kepildendirilgen transfert 2029 jyldan bastap 2,0 trln teńgege deıin tómendeıdi. Bıýdjet tapshylyǵy 2029 jyly jalpy ishki ónimge qatysty birtindep 0,4%-ǵa deıin tómendep 2030 jyldan bastap nóldik deńgeıge jetedi dep boljanyp otyr. Bıýdjettik parametrlerdiń makroboljamy men boljamy eskergende, memlekettik josparlaý júıesi qujattarynyń qarjylyq qamtamasyz etilý kólemi respýblıkalyq jáne jergilikti bıýdjettiń shyǵysyn eskere otyryp, 2026 jyly 37,4 trln teńgeni, 2027 jyly — 39,6 trln teńgeni, 2028 jyly — 41,6 trln teńgeni quraıdy, — deıdi vıtse-premer.

Buǵan deıin Úkimettiń jalpy ishki ónim, ınflıatsııa, ulttyq qor, bıýdjetti toltyrý boıynsha 2026-2028 jyldarǵa arnalǵan ekonomıkalyq boljamy týraly jazǵan edik.