2035 jyly 1,8 mln jumysshy mamanǵa suranys bolady
ASTANA. KAZINFORM – Aldaǵy jyldary Qazaqstanda kolledjderge túsetin jastar sany aıtarlyqtaı artady. 2030 jylǵa qaraı 15-18 jastaǵy jastardyń sany 34%-ǵa ósip, 1,1 mln adamnan 1,5 mln adamǵa deıin jetedi. Al eńbek naryǵyna jyl saıyn 225-256 myń jańa maman qajet bolady.
Osyǵan baılanysty tehnıkalyq jáne kásiptik bilim berý júıesin aldyn ala jańǵyrtý qajettiligi artyp otyr.
Oqý-aǵartý mınıstri Juldyz Súleımenovanyń aıtýynsha, 2030 jylǵa qaraı Qazaqstan halqy 10%-ǵa ósip, 21,6 mln adamǵa, 15-28 jastaǵy jastar sany 29%-ǵa artyp, 4,6 mln adamǵa jetedi.
– Kolledj jasyndaǵy 15-18 jastaǵy kontıngent 34%-ǵa ósip, 1,1 mln-nan 1,5 mln adamǵa deıin kóbeıedi. Osy kezeńde eńbek naryǵynyń jyl saıynǵy qajettiligi 225-256 myń adamdy quraıdy, – dedi mınıstr Úkimet otyrysynda.
Suranysy joǵary mamandyqtardyń 70%-dan astamy Tehnıkalyq jáne kásiptik bilim berý júıesine tıesili.
– 2035 jylǵa qaraı 1,8 mln astam jumysshy mamanǵa suranys bolady. Onyń ishinde ónerkásipke – 183 myń, qurylysqa – 102 myń, aýyl sharýashylyǵyna – 73 myń, IT salasyna – 12 myń maman qajet. Kadr tapshylyǵy ásirese qurylys pen aýyl sharýashylyǵynda baıqalady, – dedi mınıstr.
Qurylys salasynda 102 myń mamanǵa qajettilik bar, al osy baǵytta 22,4 myń stýdent oqıdy, ıaǵnı suranys – 4,5 ese joǵary.
– Aýyl sharýashylyǵynda 73 myń maman qajet bolsa, bilim alýshylar sany 12,7 myń, bul suranystan 5,7 ese az. Atalǵan alshaqtyq memlekettik tapsyrysty óńirler men salalardyń kadrlyq qajettiligine sáıkes qaıta bólýdi talap etedi, – dedi J. Súleımenova.
Buǵan deıin J. Súleımenova Qazaqstan kolledjderinen 32 mamandyq alynyp tastalýy múmkin ekenin aıtqan edi.
Olardyń ornyna 20 jańa mamandyq paıda bolady.
