2035 jylǵa qaraı qazaqstandyqtardyń 80 paıyzy tabıǵı gazǵa qol jetkizedi - mınıstr
ASTANA. KAZINFORM – Prezıdenttiń Parlament palatalarynyń birlesken otyrysynda bergen tapsyrmalaryn júzege asyrý aıasynda Qazaqstanda óńirlerdi gazben qamtý jedeldetiledi. Halyqty qamtý deńgeıi 2035 jylǵa qaraı 80%-ǵa deıin jetpek. Bul týraly Úkimet otyrysynda Energetıka mınıstri Erlan Aqkenjenov málimdedi.
Soltústik óńirlerdi gazdandyrý maqsatynda 2025 jylǵy 9 qazanda Qazaqstan Úkimeti men «Gazprom» Jarııa aktsıonerlik qoǵamy arasynda «Ishım — Astana» magıstraldyq gaz qubyryn salý jobasyn iske asyrý týraly memorandýmǵa qol qoıyldy.
— Jobany iske asyrý Astana, Kókshetaý jáne Petropavl qalalaryn senimdi gazben qamtamasyz etýge, sondaı-aq eldiń soltústik óńirlerine tabıǵı gaz jetkizý marshrýttaryn ártaraptandyrýǵa múmkindik beredi. Jergilikti atqarýshy organdar iske asyratyn gazdandyrý jobalary ýaqytyly qarjylandyrylǵan, sondaı-aq «Ishım — Astana» magıstraldyq gaz qubyry jobasy tabysty iske asyrylǵan jaǵdaıda, eldi gazdandyrý deńgeıin 2035 jylǵa qaraı 64,2%-dan 80%-ǵa deıin ulǵaıtý josparlanyp otyr, — dedi E. Aqkenjenov.
2025 jyly gaz tranzıti 70,4 mlrd tekshe metr boldy. Bıylǵy jospar — 73,3 mlrd tekshe metr.
— Alǵashqy 5 aıdaǵy naqty kórsetkish 30,3 mlrd tekshe metrge jetti. Jyl qorytyndysy boıynsha barlyq josparly kórsetkishterge qol jetkizý kózdelgen, — dedi Energetıka mınıstri.
Aıta keteıik, Qazaqstanda gazdandyrý deńgeıi 64,2%-ǵa jetti. Taýarlyq gazdyń resýrstyq bazasyn ulǵaıtý maqsatynda jańa ken oryndaryn ıgerý josparlanyp otyr.
