2035 jylǵa qaraı Frantsııa áskerinde eriktiler sany 50 myńǵa jetedi

ASTANA. KAZINFORM – Frantsııa Prezıdenti beısenbi kúni 2026 jyly Frantsııa 18-19 jas aralyǵyndaǵy jastar úshin erikti áskerı qyzmet baǵdarlamasyn bastaıtynyn jarııalady, dep habarlaıdy Kazinform agenttiginiń menshikti tilshisi.

Bastapqyda 3 myń erikti tartý josparlanǵan, al 2035 jylǵa qaraı qatysýshylar sany 50 myńǵa jetýi tıis.

Baǵdarlama aıasynda jastar arnaıy «mobılızatsııa kúni» kezinde irikteledi, olardyń áskerı qyzmetke degen yntasy men qarýly kúshterdiń qajettilikteri eskeriledi.

Eriktiler on aı qyzmet atqarady: birinshi aıda áskerı isterdiń negizderi men qarýdy qoldanýdy úırenedi, qalǵan toǵyz aıda tek Frantsııa aýmaǵynda ornalasqan áskerı bólimde qyzmet etedi.

Eriktiler qyzmeti úshin aqy alady jáne 2015 jyldan beri júrgizilip kele jatqan Frantsııanyń ishki qaýipsizdigin qamtamasyz etý operatsııasy Sentinelle qosa alǵanda, barlyq mıssııalarǵa qatysady.

Emmanıýel Makron Frantsııada 1996 jyly toqtatylyp, 2001 jyly tolyq aıaqtalǵan jalpy áskerı mindetke oralý múmkindigin joqqa shyǵardy. Ol baǵdarlamaǵa sáıkes ár jyl saıyn 600–800 myń jas tartylýy tıis.

— Bizge mobılızatsııa qajet, — dedi E.Makron, Frantsııanyń árdaıym daıyn bolýy jáne qurmetke ıe bolýy mańyzdy ekenin atap ótti.

Prezıdent bul bastamany Frantsııany tez damyp kele jatqan qaterlerden qorǵaý sharasy dep sıpattady.

Aıta keteıik, budan buryn Makron jaqyn arada áskerı qyzmetke erikti shaqyrý týraly jarııalaýy múmkin ekeni aıtylǵan edi.