2035 jylǵa qaraı Astananyń turǵyn úı qory 68,2 mln sharshy metrge jetedi
ASTANA. KAZINFORM – Astanada turǵyn úı qurylysynyń joǵary qarqyny saqtalyp otyr. Osyǵan baılanysty elordanyń áleýmettik ınfraqurylymyn damytýdyń uzaq merzimdi jospary qalyptasyp otyr.
Bul týraly qaladaǵy Astana qalasynyń sáýlet, qala qurylysy jáne jer qatynastary basqarmasy habarlady.
Vedomstvonyń málimetinshe, 2035 jylǵa qaraı elordanyń turǵyn úı qory 68,2 mıllıon sharshy metrge jetedi. Sońǵy úsh jylda bul kórsetkish 40 paıyzǵa ósip, 2026 jylǵy 1 qańtardaǵy jaǵdaı boıynsha 41,5 mıllıon sharshy metr boldy. Al 2022–2025 jyldar aralyǵynda qalada 15,4 mıllıon sharshy metrden astam turǵyn úı paıdalanýǵa berildi.
Turǵyn úı qurylysynyń qarqyndy damýy aıasynda qalada áleýmettik ınfraqurylymdy damytýdyń aýqymdy jobasy qalyptasyp jatyr. Bas josparǵa sáıkes, 2035 jylǵa qaraı Astanadaǵy áleýmettik nysandar sany 1 099 deıin jetedi.
Olardyń qatarynda 374 mektep, 378 balabaqsha, 184 densaýlyq saqtaý nysany, 140 sport jáne mádenıet nysany, sondaı-aq 23 Oqýshylar saraıy bolady.
Basqarma málimetinshe, jańa turǵyn aýdandaryn jobalaý kezinde halyqty qamtamasyz etý normatıvterine sáıkes áleýmettik ınfraqurylym nysandaryn mindetti túrde ornalastyrý qarastyrylǵan.
Bas jospardy iske asyrý turǵyn úı qurylysy men elorda halqy sanynyń turaqty ósýin eskere otyryp, teńgerimdi qalalyq ortany qalyptastyrýǵa baǵyttalǵan.
Buǵan deıin Qazaqstannyń qurylys naryǵy 13,4 paıyzǵa óskeni belgili boldy.
