2035 jylǵa deıin elordada 2 myń gektar jerdegi eski qurylys súriledi

ASTANA. KAZINFORM – «Astana bas jospary» ǵylymı-zertteý jobalaý ınstıtýtynyń bas dırektory Rýslan Jaqypov elordada renovatsııa baǵdarlamasynyń iske asý barysymen tanystyrdy.

«Bas josparda eski obektilerdi súrý baǵdarlamasy qarastyrylǵan. Súrilgen eski obektilerdiń ornyna áleýmettik obektiler, turǵyn úıler jáne kósheler salý josparlanǵan. Jobada aıasynda 2035 jylǵa deıin shashamen 2 myń gektar jerdegi eski qurylysty súrý qarastyrylǵan.

Jumys kezeń-kezeńimen júredi, alǵashynda 494,2 gektar, ekinshi kezeńde 1019 gektar jáne úshinshi kezeńde 465,6 gektar kólemde obektini súrý kózdelgen», - dedi Rýslan Jaqypov elorda máslıhaty janyndaǵy qoǵamdyq keńes otyrysynda. 

Onyń aıtýynsha, renovatsııa qarqyny ınvestıtsııaǵa jáne eldegi makroekonomıkalyq jaǵdaıǵa baılanysty. 

«Jalpy elordanyń bas jospary aıasynda 2024-2030 jyldar aralyǵynda 673 turǵyn úı obektisi, 201 bilim berý jáne 131 kommertsııalyq obekti salynady. Sonymen qatar 337,2 shaqyrym jol jáne 333 shaqyrym ınjenerlik jeli salynady jáne qaıta jóndeledi», - deıdi ol. 

Elordanyń bas jospary aıasynda qansha turǵyn úı salynatyny belgili boldy.

Sondaı-aq 2025 jyly Astanada káriz sýyn tazalaıtyn júıe qurylysy salynatynyn habarlaǵan edik. 

Aıta keteıik, búgin Astana bas jospary mekemesiniń qabyrǵasynda qoǵamdyq keńes otyrysy ótti. Ol jerde elordanyń 2035 jylǵa deıin bas josparyn iske asyrý barysy talqylandy. Jobanyń maqsaty – jınaqy ári tıimdi qala qurý.