2035 jylǵa deıin ekonomıkaǵa taǵy 2,9 mln kadr qajet bolady — Asqarbek Ertaev
ASTANA. KAZINFORM — Úkimet otyrysynda Eńbek jáne halyqty áleýmettik qorǵaý mınıstri Asqarbek Ertaev Qazaqstandaǵy jumys kúshi jáne keleshekte qosymsha qansha maman qajet bolatyny jóninde málimdeme jasady.
— Búgingi kúni kadrlarmen qamtamasyz etý ekonomıkanyń ornyqty damýynyń negizgi faktoryna aınalyp otyr. Basty mindet — ekonomıkanyń naqty qajettiligi, jumyskerlerdiń biliktiligi jáne kadrlar daıarlaý júıesi arasyndaǵy sáıkestikti qamtamasyz etý. Osy prıntsıpke oraı, jumysshy mamandyqtar boıynsha kadrlar daıarlaýdyń jańa tásilderi qurylatyn bolady, — dep aldaǵy maqsattardy atap ótti ol.
Sonymen birge, ol qazirgi jaǵdaıǵa toqtaldy. Mınıstrdiń sózinshe, búginde elde jumys kúshiniń sany — 9,8 mln adam. Onyń jumyspen qamtylǵany — 9,4 mln kisi, ıaǵnı jumyspen qamtý deńgeıi — 96%.
— Eńbek naryǵynda jumysshy kadrlarǵa turaqty suranys baıqalyp otyr. Elektrondyq eńbek bırjasyna ornalastyrylǵan bos oryndardyń jartysynan astamy — jumysshy mamandyqtar ekenin atap ótkim keledi. Negizgi mindet — suranysty qalyptastyrý emes, kadr daıyndaýdyń ekonomıkanyń aǵymdaǵy jáne perspektıvtik qajettilikterine sáıkestigin qamtamasyz etý, — dedi Eńbek jáne halyqty áleýmettik qorǵaý mınıstri.
Asqarbek Ertaev keleshekke qandaı boljam bar ekenin de aıtty. Onyń sózinshe, 2035 jylǵa deıin ekonomıkaǵa taǵy 2,9 mln kadr qajet bolady. Onyń ishinde jumysshy mamandyqtar boıynsha kerek kadrler sany — 1,8 mln adam.
Aıta keteıik, buǵan deıin jyl saıyn elimizge 300 myńdaı shetel azamaty jumys isteýge keletinin jazǵanbyz.
