2033 jyldyń sońynda JІÓ ósim qarqyny bazalyq stsenarııge qatysty 1,3 paıyzǵa artpaq

ASTANA. QazAqparat - «Jasyl ekonomıka» nátıjesinde 2033 jyldyń sońyna taman JІÓ ósim qarqyny bazalyq stsenarııge qatysty 1,3 paıyzǵa artatyny boljanady. Búgin Astanada Qazaqstan Premer-Mınıstri Kárim Másimovtiń tóraǵalyǵymen ótip jatqan QR Prezıdenti janyndaǵy «Jasyl ekonomıkaǵa» kóshý jónindegi keńestiń tórtinshi otyrysynda energetıka mınıstri Qanat Bozymbaev osylaı málim etti. Keńes barysynda Qazaqstannyń Parıj klımattyq kelisimin iske asyrý tetikteri talqylanǵan bolatyn.

«Energetıka mınıstrligi Dúnıejúzilik bankpen áriptestik aıasynda alǵa júktelgen mindetterge 2030 jylǵa deıin qol jetkizý máselelerin zerttegen bolatyn. Esepteýlerge sáıkes, shyǵaryndylardy tómendetý saıasaty boıynsha makroekonomıkalyq sektorda oń nátıjelerge qol jetetini kútiledi. 2033 jyldyń sońyna taman JІÓ ósim qarqyny bazalyq stsenarııge qatysty 1,3 paıyzǵa artatyny boljanady. Parıj klımattyq kelisimin ratıfıkatsııalaǵan jaǵdaıda Qazaqstan munaı-kómirsýtekti damytý salasynda aıtarlyqtaı múmkindikterge ıe bolady», deıdi Q. Bozymbaev.

Energetıka mınıstriniń sózine qaraǵanda, bul eń aldymen ulttyq ekonomıkanyń barlyq sektorynda energotıimdilikti arttyrý esebinen oryn almaq. Ekinshiden, tıimdilik jańartylatyn energııa kózderin damytý esebinen, úshinshiden, orman men jasyl jelekterdi damytýdan, tórtinshiden, shyǵaryndylar salasyndaǵy júıeli saýdany damytý esebinen oryn alatyny boljanady.

«Shyǵaryndylardy tómendetýdiń eń aýqymdy áleýeti shyǵaryndylarmen saýdalasý sektorlarynda, sonyń ishinde elektr men jylý óndirý, munaı jáne kómir óndirý salasynda oryn alyp otyr», - dedi mınıstr.