2032 jylǵy Olımpıada jáne Paralımpıada oıyndarynyń resmı emblemasy tanystyryldy
ASTANA. KAZINFORM – 2032 jyly Brısbende (Aýstralııa) ótetin Olımpıada jáne Paralımpıada oıyndarynyń resmı emblemalary tanystyryldy. Emblemalardan eldiń tabıǵaty men mádenıetine tán erekshelikterdi kórýge bolady.
Emblemalardyń basty beınesi - Aýstralııada mekendeıtin kakadýdyń eki túri. Olımpıada oıyndarynyń sımvoly retinde qyzǵylt kakadý, al Paralımpıada oıyndarynyń sımvoly retinde sary aıdarly kakadý tańdalǵan.
Dızaında basqa da nyshandar kórinis tapqan. Qustardyń aıdarlarynan Kvınslend shtatynyń sulbasyn baıqaýǵa bolady, al Olımpıada jáne Paralımpıada alaýy birlik, úmit pen shabytty bildiredi. Úsh jáne eki qaýyrsynnyń ornalasýy Aýstralııanyń jazǵy Olımpıada oıyndaryn tarıhta úshinshi ret qabyldaıtynyn meńzeıdi. Bul oıyndar 2032 jyly ótedi.
Kakadý beınesi Aýstralııanyń baıyrǵy halyqtary úshin de erekshe mánge ıe. Olardyń mádenıetinde bul qustar jermen jáne dástúrmen tyǵyz baılanysty. Sondaı-aq olar adamdardy belgili bir jerlermen, tarıhpen jáne jón-joralǵylarymen baılanystyratyn habarshy retinde sanalady.
Eki emblemada da arnaıy ázirlengen qarippen jazylǵan «Brisbane 2032» degen jazý bar. Olımpıada emblemasynda bes saqına, al Paralımpıada emblemasynda agıtos belgisi beınelengen.
Jańa nyshandar Kvınslendtiń ár óńirinde birtindep tanystyryldy. Dızaınnyń alty bóligi sol aımaqtyń bes jerinde, atap aıtqanda, Úlken tosqaýyl rıfinde, Kasl-Hıllde, Rokgempton jaǵalaýynda, Ýaıldhors taýynda jáne Karrambın jaǵajaıynda kópshilik nazaryna usynyldy.
Keıin barlyq element biriktirilip, eki tolyqqandy emblema jasaldy. Olar alǵash ret Brısbenniń Saýt-Benk aýdanynda kópshilikke kórsetildi.
QR UOK málimetinshe, kórkemdik tujyrymdamany «Brısben-2032» Uıymdastyrý komıtetiniń jetekshiligimen jergilikti jáne halyqaralyq shyǵarmashylyq agenttikterden quralǵan top ázirledi.
Tanystyrylǵan emblemalar aldaǵy Oıyndardyń bezendirilýinde keńinen qoldanylatyn bolady. Al Olımpıada men Paralımpıada oıyndarynyń tumary nemese tumarlary keıinirek tanystyrylady.
Aıta keteıik, Brısbendegi jazǵy Olımpıada oıyndary 2032 jyly 23 shilde men 8 tamyz aralyǵynda, al Paralımpıada oıyndary 24 tamyz ben 5 qyrkúıek aralyǵynda ótedi.
Aıta keteıik, 2036 jylǵy jazǵy Olımpıada oıyndaryn ótkizýge jeti el úmitker.
