2031 jylǵa qaraı JI adamzattan aqyldy bolýy múmkin – Ilon Mask

ASTANA.KAZINFORM - Davostaǵy Dúnıejúzilik ekonomıkalyq forýmnyń paneldik talqylaýyna qatysqan amerıkalyq mıllıarder Ilon Mask jasandy ıntellekt bes jyl ishinde adamnyń ujymdyq ıntellektisinen asyp túsýi múmkin dep boljady, dep habarlaıdy Kazinform agenttigi.

- 10 jyldan keıin ne bolatynyn bilmeımin, biraq jasandy ıntellektiniń damý qarqynyn eskersek, osy jyldyń sońyna deıin kez kelgen adamnan jasandy ıntellekt aqyldyraq bolýy múmkin dep oılaımyn. Kelesi jyldan keshiktirmeı, múmkin 2030 nemese 2031 jylǵa qaraı, aıtalyq, bes jyldan keıin jasandy ıntellekt búkil adamzattyń qosyndysynan aqyldy bolady dep aıtar edim,- dedi Mask.

NDTV arnasynyń málimeti boıynsha, ol jasandy ıntellekt pen robototehnıka buryn-sońdy bolmaǵan ekonomıkalyq órleýdiń kýási bolatynyn málimdedi.

- Biz sonshama kóp robottar men jasandy ıntellekt jasaımyz, olar adam qajettilikterin tıimdi qanaǵattandyrady. Men robottar adamdarǵa qaraǵanda kóbirek bolady dep boljaımyn,- dep qosty mıllıarder.

Kásipker aýdıtorııaǵa robottar qoǵamdy ózgertip, qol eńbegin azaıtý arqyly adamzatqa kómektesetinin jáne kóbirek robottar shyǵaratyn ýaqyt keletinin boljady.

Ol jer betindegi árbir adam qart ata-analarǵa nemese balalarǵa qaraıtyn robotty qalaıtynyn aıtty.

«Balalarǵa nemese úı janýarlaryna qaraıtyn óte qaýipsiz robotty kim qalamaıdy? » degen suraq qoıdy Mask.

Masktyń Dúnıejúzilik ekonomıkalyq forýmǵa qatysýy erekshe nazar aýdararlyq boldy, óıtkeni ol jyl saıynǵy is-sharany elıtalyq, jaýapsyz jáne qarapaıym adamdarmen baılanysy joq dep ashyq synǵa alatyn.

Ilon Mask buǵan deıin Tesla kompanııasynyń 2027 jyly Optimus gýmanoıdty robottaryn sata bastaıtynyn jarııalaǵan bolatyn.