2031 jylǵa deıin Abaı oblysynda 90 aýyl sharýashylyǵy jobasy júzege asyrylady
ASTANA. KAZINFORM - Memleket basshysynyń aýyl sharýashylyǵynyń jalpy ónim kólemin eki esege arttyrý jónindegi tapsyrmasy aıasynda óńirde agroónerkásip keshenin damytýǵa baǵyttalǵan aýqymdy strategııa júzege asyrylyp jatyr, dep habarlaıdy QR aýyl sharýashylyǵy mınıstrliginiń baspasóz qyzmeti.
Negizgi baǵyttar retinde et óndirisin damytý, qus sharýashylyǵyn órkendetý, sút fermalaryn salý, sondaı-aq sýarmaly jerlerdi tıimdi paıdalaný belgilengen.
2031 jylǵa deıin óńirdegi ınvestıtsııalyq jobalar tizimine jalpy quny 254 mlrd teńgeni quraıtyn 90 bastama engizilgen.
Jobalardyń qatarynda Besqaraǵaı aýdanynda jylyna 150 mln jumyrtqa óndiretin qus fabrıkasyn salý qarastyrylǵan. Investıtsııa kólemi 5,5 mlrd teńgeni quraıtyn nysandy bıyl paıdalanýǵa berý josparlanyp otyr.
Sútti mal sharýashylyǵyn damytýǵa erekshe kóńil bólingen. Atap aıtqanda, Jarma aýdanynda 600 basqa arnalǵan jáne Besqaraǵaı aýdanynda 1200 basqa arnalǵan sút fermalaryn salý kózdelgen.
Aýyl sharýashylyǵy mınıstrligimen birlesip iri ınvestıtsııalyq jobalardy iske asyrý jónindegi Jol kartasy júzege asyrylyp jatyr. 2029 jylǵa deıin jalpy quny 112,5 mlrd teńge bolatyn 19 jobany oryndaý kózdelgen. Bıyl alty nysan paıdalanýǵa berilip, 400-den astam jańa jumys orny ashylmaq.
-Birqatar jobalar qazirdiń ózinde naqty iske asyrý kezeńine ótken. Máselen, bıylǵy aqpan aıynda quny 4 mlrd teńge bolatyn «Agrolıder KAZ» seriktestiginiń burshaq jáne basqa da aýyl sharýashylyǵy daqyldaryn óńdeý jáne tazalaý zaýyty iske qosyldy,-delingen habarlamada.
Aldaǵy mańyzdy jobalar qatarynda «Qazaq Astyq Group» seriktestigi bazasynda jylyna 72 myń tonna tazartylǵan kúnbaǵys maıyn óndiretin zaýyt (ınvestıtsııa kólemi – 8,3 mlrd teńge), sondaı-aq «Evrazııa Agro Semeı» seriktestigi bazasynda jylyna 11 400 tonna ónim óndiretin et kombınaty (ınvestıtsııa kólemi – 7,7 mlrd teńge) bar.
Olardyń barlyǵy salanyń óndiristik áleýetin aıtarlyqtaı arttyryp, azyq-túlik qaýipsizdigin qamtamasyz etýge jáne jańa jumys oryndaryn ashýǵa múmkindik beredi.
Osyǵan deıin Qazaqstan men Túrkııa ǵalymdary aýyl sharýashylyǵy salasynda birlesip zertteý júrgizip jatqany týraly jazdyq.
