2030 jyly Ortalyq Azııanyń kelbeti qandaı bolady – sarapshylar arasyndaǵy saýalnama

ASTANA. QazAqparat – Qazaqstan strategııalyq zertteýler ınstıtýty Ortalyq Azııanyń aldaǵy 7 jyldaǵy keleshegi týraly saraptamalyq saýalnama júrgizdi. Oǵan qatysqandardyń 50% astamy Ortalyq Azııany tranzıttik habqa aınalǵanyn kórgisi keletinin aıtqan.

Sarapshylardyń 33,3% irgeles elderdiń arasynda básekelestik kúsheıe túsetinin boljasa, 56,4% Ortalyq Azııa memleketteri tutas bir tranzıttik hab qurýy múmkin degen toqtamǵa kelgen. Sondaı-aq sarapshylardyń 64,1% 2030 jylǵa qaraı bul elderdi biriktirýshi basty faktor ujymdyq qaýipsizdik máselesi bolady degen uıǵarym aıtqan.

Ekonomıkalyq ıntegratsııa týraly aıtqanda sarapshylardyń kóbi saýda-kólik baılanysynyń áleýetine erekshe nazar aýdarǵan. ıAǵnı, elderdiń basty kólik dálizderin jalǵaý arqyly júk tasymalynyń kólemin arttyrýǵa bolatynyn meńzegen. Respondentterdiń 69,2% kólik qatynastary Ortalyq Azııa úshin negizgi ósý núktesi bola alatynyn, sondyqtan ınfraqurylymdy jetildirýge arnalǵan jobalar ınvestıtsııalyq turǵyda da tartymdy bolatynyn aıtqan.

Saýalnamaǵa qatysqanda óńirde halyq sany udaıy ósip kele jatqandyqtan ekonomıkalardyń negizgi draıveriniń biri qurylys salasy bolyp qala beretinin boljaǵan. Statıstıka boıynsha, Ortalyq Azııada jyl saıyn 2 mıllıonǵa jýyq adam ómirge keledi.

Sarapshylar Ortalyq Azııa aýqymyndaǵy kooperatsııanyń keleshegine de úmitpen qarap otyr. Respondentterdiń kóbi kooperatsııalyq baılanystardyń qazirgi deńgeıin «jetkiliksiz» dep baǵalaǵan. Sondaı-aq 51,3% sarapshy kooperatsııa deńgeıin Ortalyq Azııa aýqymyndaǵy uıymdar arqyly jetildirý kerek degen paıym bildirgen.

Sarapshylardyń taǵy bir bóligi óńirdegi kooperatsııa deńgeıi «ishinara jetkilikti», sý resýrstaryn basqarý, energetıka, azyq-túlik qaýipsizdigi sııaqty jekelegen salalardaǵy yntymaqtastyqty ınstıtýttar negizinde jetildirý qajet dep baǵalaǵan.

Foto: KISI