2030 jyly Qazaqstanda jańartylatyn energııa kózderin óndirý 15%-ǵa ulǵaımaq

NUR-SULTAN. QazAqparat – Elimiz «jasyl» energetıkany óndirýdi odan ári damyta túspek. Sondaı-aq, Qazaqstanda jańartylatyn energııa kózderin óndirý 15%-ǵa deıin ulǵaıtý jospary tur. Osy oraıda otandyq energetıka salasyn damytý týraly QR Premer-Mınıstri Asqar Mamın sala mınıstrligi aldyndaǵy mindetpen bólisti, dep habarlaıdy QazAqparat tilshisi.

«Qazirgi tańda elimizde polıpropılen, polıetılen jáne býtadıen óndirý boıynsha jalpy quny 11 mlrd dollardy quraıtyn iri jobalar iske asyp jatyr. Bul jobalardyń salany damytý úshin mańyzy zor. Sondyqtan olardy sapaly iske asyrý, josparly qýatqa shyǵý jáne kásiporyndardy ótkizý naryqtarymen qamtamasyz etý qajet. Qazirgi kezde elde energııa negizinen kómir esebinen óndiriledi. Bul oraıda qazirgi zamanǵy kómirtegi beıtaraptyǵyna qol jetkizý úshin bizdiń aldymyzda «jasyl» energetıkany damytý mindeti tur», - dedi A. Mamın.

Onyń aıtýynsha, energetıka salasyna qatysty zańnamalyq ózgeristerdi qaıta pysyqtaý qajet.

«Búginde jańartylatyn energııa kózderin óndiretin 134 nysan jumys istep tur. Ondaǵy jyldyq óndiristiń jalpy kólemi 3,3 paıyzdy quraıdy. 2030 jyly onyń úlesin 15 paıyzǵa deıin ulǵaıtý kerek. Bul protsesti jandandyrý úshin jeke óndiristik qajettilikter úshin jańartylatyn energııa kózderi nysandaryn salýǵa qatysty zańnamalyq ózgeristerdi pysyqtaý qajet. Qazaqstannyń elektr energetıkasy júıesiniń turaqtylyǵyn qamtamasyz etý úshin otyn-energetıka keshenin tezdetip jańǵyrtý jáne jańa qýattardy salý qajet», - deıdi Úkimet basshysy.