2030 jyly egis qurylymynda masaqty dándi daqyldar qandaı kólemde bolady
NUR-SULTAN. QazAqparat – Kúrish sııaqty sýdy kóp qajet etetin daqyldar úlesi azaıtylady. Bul týraly Úkimet otyrysynda QR Aýyl sharýashylyǵy mınıstri Saparhan Omarov málim etti, dep habarlaıdy QazAqparat tilshisi.
«Aýyl sharýashylyǵy eńbekkerlerin zamanaýı ylǵal únemdeý tehnologııalaryn qoldanýǵa kóshýge yntalandyrý maqsatynda Mınıstrlik jabdyqtar satyp alýǵa, sondaı-aq barlyq qajetti ınfraqurylymdy júrgizýge jumsalǵan shyǵyndardyń 50%-yn óteýdi kózdeıtin ınvestıtsııalyq sýbsıdııalaý túrindegi memlekettik qoldaýdy júzege asyrady.
Fermerlerdi oqytý jáne bilimin jetildirý júzege asyrylýda, onyń ishinde bul demonstratsııalyq fermalar jelisi arqyly da júrgizilýde. Jańa Sý resýrstaryn basqarýdyń 2030 jylǵa deıingi memlekettik baǵdarlamasynyń jobasynda sý únemdeý tehnologııalary qoldanylatyn alańdy 750 myń gektarǵa deıin jetkizý jónindegi ındıkator kózdelgenin atap ótken jón», - dedi mınıstr.
Sýarýdyń sý únemdeý tehnologııalaryn tolyq kólemde engizý sý shyǵynyn azaıtyp, ónimdilikti arttyra otyryp, sýarmaly jerlerdi utymdy paıdalanýǵa múmkindik beredi.
«Sýarmaly jerlerdiń alańyn 3 mln gektarǵa deıin jetkizý qajettiligin eskere otyryp, mınıstrlik 2018 jyly egis alqaptarynyń boljamdy qurylymyn ázirledi. Bul qurylym oblystar ákimdikterine iske asyrý úshin joldandy. Kórsetilgen aýyl sharýashylyǵy daqyldary egisiniń boljamdy qurylymynda kúrish sııaqty sýdy kóp qajet etetin daqyldar úlesiniń 75 myń gektarǵa deıin jáne maqta daqyldary úlesiniń 100 myń gektarǵa deıin azaıýy eskerilgen. Sondaı-aq, 2030 jyly egis qurylymynda masaqty dándi daqyldardy 50 myń gektarǵa deıin kemitý josparlanýda, bul rette soltústik óńirde dándi daqyldardy azyqtyq aýyspaly egiste sýarý kózdelgen.
Egis qurylymy ońtaıly sýarmaly jerlerdiń kórsetilgen alańyn durys paıdalaný Memleket basshysynyń joǵary rentabeldi daqyldar óndirisine kóshý, ımportty almastyrý jáne sýarmaly jerler alańyn 2030 jylǵa deıin birtindep 3 mln gekterǵa deıin jetkizý boıynsha qoıǵan mindetterin oryndaýǵa múmkindik beredi», - dedi S. Omarov.
Budan buryn habarlanǵandaı, búgin Úkimet otyrysynda Premer-Mınıstr Asqar Mamın ózen sýlaryn únemdi paıdalanýǵa qatysty birqatar tapsyrma berdi.
