2030 jylǵa qaraı syrttan keletin sý kólemi azaıady – Serikqalı Brekeshev

NUR-SULTAN. QazAqparat – 2030 jylǵa qaraı Qazaqstanda 23,2 tekshe shaqyrym sý tapshy bolady. QR Ekologııa, geologııa jáne tabıǵı resýrstar mınıstri Serikqalı Brekeshev Májiliste ótip jatqan parlamenttik tyńdaýda osyndaı málimet aıtty,dep habarlaıdy QazAqparat tilshisi.

«Byltyrǵy baqylaý qorytyndysy boıynsha 32 sý obektisinde sý sapasy nashar, al 28 sý obektisi óte nashar klasqa jatqyzyldy. Sý sapasy tómendep, tehnogendik lastanǵan Balqash-Alakól, Aral-Syrdarııa, Ertis jáne Tobyl-Torǵaı basseıni – birinshi kezektegi problema. Sý sapasy odan ári tómendeýi jáne sý resýrsyna júkteme kóbeıýi ekojúıeniń tepe-teńdiginiń buzylýyna ákelýi múmkin», - dedi mınıstr.

Onyń aıtýyna qaraǵanda, keleshekte halyq sany men mal basynyń ósýi, óndiris oshaǵynyń kóbeıýi sý tutyný kólemi 29,7 tekshe kılometrge deıin ulǵaıtýy múmkin.

«2030 jylǵa qaraı ishki ózen aǵyny 102,3-ten 99,4 tekshe kılometrge deıin qysqarady. Onyń ishinde shektes elderden keletin aǵyn 47,8-den 46,5 tekshe kılometrge deıin qysqarýy múmkin. Osyǵan baılanysty sý tapshylyǵy 23,2 tekshe kılometrdi quraıdy. Bul halyqtyń jáne ekonomıkanyń jyl saıynǵy sý paıdalaný kólemimen birdeı. Eger sý paıdalaný tıimdiligi óspese, onda 2040 jylǵa qaraı elimizdi sýmen qamtamasyz etý jaǵdaıy nasharlaýy múmkin», - dedi Serikqalı Brekeshev.

Májilis tóraǵasy Erlan Qoshanovtyń málimeti boıynsha, 2040 jylǵa qaraı Qazaqstanda sý tutyný 46 paıyzǵa artady.