2030 jylǵa qaraı Shymkent halqy jarty mıllıonnan astamǵa kóbeıedi
ShYMKENT. QazAqparat - Ońtústik Qazaqstan oblysynyń ákimi Janseıit Túımebaevtyń tóraǵalyǵymen Shymkent qalasyn aýmaqtyq damytýdyń óńiraralyq jobasyn ázirleý máselesi boıynsha keńeıtilgen májilis ótti. Jıynǵa Báıdibek, Qazyǵurt, Ordabasy, Saryaǵash, Saıram, Túlkibas jáne Tólebı aýdandary men Shymkent, Arys qalalarynyń basshylary, sáýlet jáne qala qurylysy, oblystyq basqarma basshylary qatysty, dep habarlaıdy QazAqparat tilshisi.
Jıynda sóz alǵan Respýblıkalyq memlekettik qala qurylysyn josparlaý jáne kadastr ortalyǵynyń bas dırektory Turlybek Musabaev Shymkent aglomeratsııasyn aýmaqtyq damytýdyń óńiraralyq shemasy ázirlengenin jetkizdi.
«Ázirlengen jobaǵa sáıkes Shymkent aglomeratsııasynyń aýmaǵy 1573,5 myń gektardy quraıdy. Shymkent aglomeratsııasynyń aýmaǵynda 1,8 mln. turǵyny bar 367 eldi meken ornalasqan. Budan bólek, 5 myńnan astam turǵyny bar 35 eldi mekenniń bas jospary jasaqtalyp otyr», - dedi Turlybek Túrikpenuly.
Jańa jobaǵa sáıkes, 2020 jylǵa qaraı Shymkent aglomeratsııasyna jatatyn aýmaqta halyq sany 185 myńnan astam adamǵa nemese 10,3 paıyzǵa artyp, 1 986 087 adamdy quraıdy degen boljam jasalyp otyr. Al 2030 jylǵa qaraı qaladaǵy halyq sany 534 779-ǵa kóbeıip, 2 mln 335 myń 773 adamdy quraıdy dep boljanýda.
Ázirlengen jobaǵa qanyqqan óńir basshysy tıisti sala basshylaryna ózgerister men usynystardy egjeı-tegjeıli taǵy da pysyqtap shyǵýǵa tapsyrma berdi.
«Shymkent qalasynyń aglomeratsııasy osyǵan deıin birneshe ret keń kólemde talqylanǵan bolatyn. Osy maqsatta oblysymyzdaǵy tıisti basqarmalar tyńǵylyqty jumys júrgizip, ózgerister men usynystardy engizip shyqty. Endi bul jobamyzdy aldaǵy jeltoqsan aıynda Úkimettiń otyrysyna bekitýge usynatyn bolamyz. Sondyqtan áttegen-aı deıtindeı máseleler bolmaýy tıis» , - dedi Janseıit Túımebaev.
Aıta keteıik, Shymkent qalasyn aýmaqtyq damytýdyń óńiraralyq jobasyn QR Investıtsııalar jáne damý mınıstrligine qarasty Qurylys jáne turǵyn úı-kommýnaldyq sharýashylyq komıteti ázirlegen bolatyn. Atalǵan jobaǵa sáıkes kontrmagnıtter retinde aýdandardyń da ákimshilik ortalyqtary anyqtalǵan. Ońtústik baǵytynda - Saryaǵash qalasy, batys baǵytynda - Arys qalasy, shyǵys baǵytynda - Turar Rysqulov selosy bolyp belgilengen.
