2030 jylǵa qaraı Ózbekstan halqynyń sany 41 mıllıonnan asady
Ózbekstan Respýblıkasynyń Boljaý jáne makroekonomıkalyq zertteýler ınstıtýtynyń málimetinshe, kóptegen elderde halyqtyń qartaıýynyń jahandyq problemasy artyp jatqanda Ózbekstanda demografııalyq jaǵdaıdyń jasarý protsesi júrip jatyr.
2022 jyldyń basyna qaraı Ózbekstan Respýblıkasyndaǵy halyq sany 35,3 mln adamdy qurady, bul ótken jylmen salystyrǵanda 712 myń adamǵa (2,1%) kóp.
Halyqtyń bul ósimi, ólim-jitim kórsetkishiniń tómen jáne týý kórsetkishiniń salystyrmaly túrde joǵary bolýyna baılanysty.
Máselen, 2021 jyly 905 myń bala dúnıege kelgen.
Sońǵy bes jylda týý kórsetkishiniń joǵarylaǵany baıqaldy.
Týýdyń jalpy koeffıtsıenti (bir áıelge shaqqandaǵy bala sany) 2016 jylǵy 2,46 baladan 2021 jyly 3,17 balaǵa deıin ósti.
Bala týýdyń kúrt ósýi negizinen 25 pen 39 jas aralyǵyndaǵy áıelderde baıqaldy.
«Demografııalyq boljamdarǵa sáıkes, 2030 jylǵa deıin týǵandar sany burynǵy deńgeıde qalady (orta eseppen 900-950 myń), al halyq sany 41 mıllıon adamnan asady. 2030 jylǵa qaraı halyqtyń jas qurylymynyń ózgerýi nátıjesinde 18 jasqa deıingi jastar men eńbekke jaramdy jastaǵy eresekterdiń sany sáıkesinshe 2,4 mıllıon jáne 1,4 mıllıon adamǵa deıin artady dep kútilip otyr», - deıdi sarapshylar.
Foto: foturist-ru.livejournal.com
