2030 jylǵa qaraı otandyq fılmder prokaty 35% artady
«Mádenıettiń barlyq baǵytyn damytý jáne qoldaýdyń júıeli sharalary jalǵasyn tabady. Mádenıet pen ónerde júrgen talantty jastardy halyqaralyq arenaǵa shyǵarý maqsatynda jańa konkýrstar, festıvalderge qatystyrý jaǵy qaralyp jatyr. Aldaǵy ýaqytta memlekettik teatr repertýarlary jyl saıyn kem degende bir otandyq qoıylymmen tolyǵyp otyrady», - dedi Ashat Oralov Úkimet otyrysynda.
Onyń aıtýynsha, otandyq kınematografııany, onyń ishinde jeke kınokompanııalardy damytý jáne qoldaý sharalary arqyly qazaqstandyq fılmderdiń prokat kólemi 2030 jylǵa deıin 35% (byltyr 13%) artady.
«Sondaı-aq qazaqstandyq kınematografııanyń halyqaralyq festıvalder men konkýrstarǵa qatysý aıasy da ulǵaıady. Óńirlerde keshendi memlekettik-jeke menshik kınoprokatty uıymdastyrý maqsatynda proektsııalyq jabdyqtar men jyljymaly kınoqondyrǵylardy kezeń-kezeńimen alý máselesi pysyqtalady», - deıdi ol.
Odan bólek, mınıstr mýzeıler men kitaphanalar kópfýnktsıonaldy aqparattyq jáne demalys ortalyǵyna aınalý kerektigin aıtty.
«Ol úshin mýzeı jáne kitaphana qorlaryn kezeń-kezeńimen tolyqtyryryp, tsıfrlandyrý sharalary qolǵa alynady. Mýzeıler men kitaphanalar zamanaýı aqparattyq tehnologııalardyń múmkindikterin paıdalana otyryp, kópfýnktsıonaldy ınstıtýttarǵa, kovorkıng ortalyqtaryna aınalady», - dedi A. Oralov.
