2030 jylǵa qaraı Qytaı ekonomıkasy álemdegi №1 ekonomıkaǵa aınalady - Q. Kelimbetov
ASTANA. 26 sáýir. QazAqparat - 2030 jylǵa qaraı nemese soǵan deıin Qytaı ekonomıkasy álemdegi №1 ekonomıka bolady. Búgin Astanada ótip jatqan Eýrazııa medıa forýmy barysynda sóz sóılegen Úkimet basshysynyń orynbasary Qaırat Kelimbetov osyndaı pikir bildirdi.
«Qazirgi tańda biz Shanhaı yntymaqtastyq uıymyna múshe-memleketterdiń damý bankin qurý máselesin talqylap jatyrmyz. Integratsııalyq jobalardy qarjylandyrý múmkindikterin de talqylaýdamyz», - dedi Qaırat Kelimbetov.
Onyń paıymynsha, 2030 jylǵa qaraı nemese soǵan deıin Qytaı ekonomıkasy álemdegi №1 ekonomıka bolady. «Sondyqtan da, bul faktini elemeý, bul jaǵdaıdy eldiń ekonomıkalyq damýyna ıkemdemeý - bul eshqandaı da eskertýdi qajet etpeıtin, zor qatelik bolatyn edi. Búkil álem osyny túsinedi, álemniń alpaýyt ınvestorlarynyń basym bóligi Qytaımen jumys istep, onda ózderiniń óndiristerin ashyp, tehnologııalardy berip jatyr. Biz de buǵan qatysty salmaqty oılanýymyz kerek», - dedi vıtse-premer.
