2030 jylǵa qaraı kún energetıkasy kómir energetıkasynan arzan bolady - N. Qapparov
ASTANA. 13 maýsym. QazAqparat - 2030 jylǵa qaraı kún energetıkasy kómir energetıkasynan arzan bolady. Búgin Parlament Senatynyń jalpy otyrysynda Qorshaǵan ortany qorǵaý mınıstri Nurlan Qapparov osylaı málim etti.
Eske salsaq, jalpy otyrysta palata depýtattary «Qazaqstan Respýblıkasynyń keıbir zańnamalyq aktilerine jańartylatyn energııa kózderin paıdalanýdy qoldaý máseleleri boıynsha ózgerister men tolyqtyrýlar engizý týraly» zań jobasyn birinshi oqylymda maquldaǵan edi.
Depýtattar saýalyna jaýap bergen mınıstr N. Qapparov aldaǵy ýaqytta álemde kómir, munaı sekildi shıkizat baǵalary arta beretinin, jańartylatyn energetıka kózi kerisinshe tómendeı túsinetinin alǵa tartty. «Mysaly kún panelderiniń baǵasy 2000 jyldan beri qaraı 85 paıyzǵa deıin arzandapty. Bul salanyń mamandary áli de jylyna 10 paıyzǵa deıin bul energetıkanyń baǵasy tómendeıtinin aıtady. Jalpy, 2020-2030 jyldarǵa qaraı kún energetıkasy kómirdiń energetıkasynan arzan bola bastaıdy», - deıdi N. Qapparov. Onyń sózine qaraǵanda, mundaı boljamdarǵa súıensek, jańartylatyn energııa kózderin qoldaýdy búginnen keshiktirmegen abzal.
