2030 jylǵa qaraı kóliktik ıntegratsııadan túsetin JІÓ kólemi 0,7%-ǵa artady
ALMATY. QazAqparat - 2030 jylǵa qaraı kóliktik ıntegratsııadan túsetin JІÓ kólemi 0,7%-ǵa artady. Bul týraly Eýrazııalyq ekonomıkalyq komıssııanyń energetıka jáne ınfraqurylym jónindegi alqa tóraǵasy - mınıstri Danıal Ahmetov aıtty.
Jaqynda EAEO-ǵa múshe elderdiń energetıka jáne ınfrastrýktýra boıynsha mınıstrleri kóliktik saıasat jobasyn talqylaǵan bolatyn. Jobany jasaý boıynsha jumys 2015 jyldyń 1 shildesine taman aıaqtalady.
«Kelisimde kóliktik saıasat jobasy joǵary ekonomıkalyq keńeste bekitilýi kerek dep kórsetilgen. 2015 jyldyń 1 shildesinde biz osy jumysty támamdaımyz. Sol jyly memleket basshylarynyń nazaryna usynatyn bolamyz», - dedi D.Ahmetov.
«Bizdiń paıymdaýymyzsha, jobany júzege asyrýdyń alǵashqy kezeńi 2020 jyly aıaqtalady. 2030 jyly kóliktik saıasaty myna sandarmen bederlenedi. Kóliktik ıntegratsııadan túsetin JІÓ kólemi Qazaqstanda - 0,7%-ǵa, Belarýs elinde 1,1 %-ǵa artady», - dedi ol.
EEK-tegi Qazaqstan ókili transporttyq kommýnıkatsııany damytýǵa basqasha kózqaras qalyptasatynyn jetkizdi.
«Kólik saıasatynda damý aldymen kúretamyr joldarda bolý kerek. Bul tek qana bir pýnkt pen ekinshisin qosatyn jol ǵana emes, óndiristik ınfraqurylymdy qamtamasyz etetin kólik magıstrali júıesi bolýy shart», - dep qorytyndylady D.Ahmetov.
