2030 jylǵa qaraı qazaqstandyqtar elektr energııasynyń 11 paıyzyn jel men kúnnen, al 8 paıyzyn atomnan alady
ASTANA. 5 maýsym. QazAqparat - 2030 jylǵa qaraı qazaqstandyqtar elektr energııasynyń 11 paıyzyn jel men kúnnen, al 8 paıyzyn atomnan alady. Bul týraly Búgin QR Prezıdenti janyndaǵy Ortalyq kommýnıkatsııalar qyzmeti uıymdastyrǵan brıfıngte QR Qorshaǵan ortany qorǵaý mınıstri Nurlan Qapparov málim etti.
Elektr energetıkasy salalasynda balamaly jáne jańartylatyn energııanyń jıyntyq úlesin 2030 jyly 30, al 250 jyly 50 paıyzǵa jetkizý kózdelip otyrǵandyǵyn atap ótken mınıstr: «ıAǵnı, tabıǵı gazdyń ishki baǵasy joǵary bolǵan jaǵdaıda bizdiń energııa sebetimizdiń 11 paıyzyn jel men kún, 8 paıyzyn atom, 10 paıyzyn sý stansalary, 21 paıyzyn gaz jáne 49 paıyzyn kómir quraıtyn bolady. 2050 jylǵa qaraı jel men kún energııa kózderiniń úlesi 39, AES pen SES - 14, gaz stansalary - 16 jáne qalǵan 31 paıyzyn jańǵyrytylǵan nemese taza tehnologııalarǵa negizdelgen jańa býyn kómir stansalary quraıdy», - dedi.
Mınıstrdiń atap ótýinshe, energııa tıimdilikti joǵarylatýǵa baǵyttalǵan sharalardy júrgizý nátıjesinde elektr qýatyn óndirý qajettiligi 2030 jylǵa qaraı - 13, al 2050 jylǵa qaraı 10 paıyzǵa azaıatyn bolady.
