2030 jylǵa qaraı Qazaqstanda sý resýrstarynyń tapshylyǵy boljanyp otyr

NUR-SULTAN. QazAqparat - 2030 jylǵa qaraı elimizde ózender aǵyny 99,4 tekshe metrge deıin azaıady. Mundaı boljamdy QR Ekologııa, geologııa jáne tabıǵı resýrstar vıtse-mınıstri Serik Qojanııazov málim etti, dep habarlaıdy QazAqparat tilshisi.

«Búginde búkil álem jahandyq klımattyń ózgerýine baılanysty syn-qaterlerge tap bolyp otyr. Qazaqstanda sý resýrstary transshekaralyq jaǵdaıǵa táýeldi jáne el aýmaǵynda sý resýrstary birkelki bólinbegen. Sonymen qatar jahandyq jylyný máselesi bar. Bunyń bári aldymen sý resýrstarynyń tapshylyǵyna alyp keledi. Ózen aǵysynyń kópjyldyq dınamıkasy kórsetip otyrǵandaı, jergilikti jáne transshekaralyq sý aǵynyn azaıtý, jalpy sý resýrstarynyń azaıýyna ákelip otyr. Eger 2000 jyly ózenniń ortasha kópjyldyq aǵymy 120 tekshe metrdi qurasa, qazir shamamen – 102 tekshe metr», - dedi Serik Qojanııazov elordada ótip jatqan «ECOJER» ІІ halyqaralyq ekologııalyq kongreste.

Onyń aıtýynsha, sý resýrstarynyń azaıýy klımattyq ózgerister men antropogendik faktorlarǵa baılanysty.

«Sońǵy jarty ǵasyrda temperatýranyń ósýine baılanysty muzdyqtardyń tozýy baıqalady. Sý resýrstarynyń azaıýy jáne halyq, ekonomıka men ekologııanyń qajettilikteri úshin sýǵa degen suranystyń ósýi jaǵdaıynda Qazaqstanda 2030 jylǵa qaraı onyń tapshylyǵy 23 tekshe metrdi quraýy múmkin. Bul kórsetkish halyqtyń jyl saıynǵy tutynýymen salystyrylady», - deıdi ol.

Aıta ketsek, búgin Nur-Sultan qalasynda «ECOJER» ІІ halyqaralyq ekologııalyq kongresi ótip jatyr. Atalǵan sharaǵa sala mamandarymen qatar, quzyrly organdar ókilderi qatysýda.