2030 jylǵa qaraı Qazaqstan halqy 20 mln-ǵa jetedi - B.Nurymbetov

ASTANA. QazAqparat - 2030 jylǵa qaraı Qazaqstan halqy 20 mıllıonǵa jetedi. Bul týraly búgin Astana ekonomıkalyq forýmy aıasyndaǵy Ósýdiń jańa úlgisin izdeý jolynda taqyrybyndaǵy sessııada QR Densaýlyq saqtaý jáne áleýmettik damý vıtse-mınıstri Birjan Nurymbetov aıtty.

«Demografııalyq boljamdarǵa sáıkes, Qazaqstan eńbekke qabilettegi jastaǵy halqynyń jyl saıynǵy tabıǵı ósimi 2017-2018 jyldary 10 myń adamǵa deıin tómendep, tek 2019 jyldan ósim kórsete bastaıdy. 2020 jyly ósim shamamen 25 myń adamdy quraıdy jáne 2050 jylǵa qaraı jyl saıynǵy ósim 100 myń adamnan asady. Bul bir jaǵynan eńbek naryǵyndaǵy kúrdeli jaıtty tómendetedi. Degenmen, ekinshi jaǵynan ekonomıkalyq ósim qarqynyna yqpal etetin bolady», - dedi ol.

Vıtse-mınıstrdiń atap ótýinshe, taıaý bolashaqta tabıǵı ósim men adamdardyń ómir súrý uzaqtyǵynyń artýyna baılanysty el halqynyń jalpy sany da kóbeıetin bolady. Osy rette ol BUU Ekonomıkalyq jáne áleýmettik ister departamentiniń boljamdy málimetterin alǵa tartty. Atalǵan derekterge qaraǵanda, 2030 jylǵa qaraı Qazaqstan halqy 14 paıyzǵa ósip, 20,1 mln. adamǵa jetetin bolady.

«Ýaqyttyń osynaý synyna jaýap berý úshin biz ishki eńbek resýrstaryn óndiristiń jumysqa tartýdy josparlaýdamyz. Búginde «Jumyspen qamtýdyń jol kartasy - 2020» baǵdarlamasyn júzege asyrýdamyz», - dedi B.Nurymbetov.