2030 jylǵa qaraı elimizde elektr energııasyn óndirý 130-175 mlrd kVt jetedi - Q. Bozymbaev

ASTANA. QazAqparat - 2030 jylǵa qaraı elimizde elektr energııasyn óndirý 130-175 mlrd kVt jetedi dep boljanady. Búgin Astanada Qazaqstan Premer-Mınıstri Kárim Másimovtyń tóraǵalyǵymen ótip jatqan QR Prezıdenti janyndaǵy «Jasyl ekonomıkaǵa» kóshý jónindegi keńestiń tórtinshi otyrysynda Energetıka mınıstri Qanat Bozymbaev osylaı málim etti. Keńes barysynda Qazaqstannyń Parıj klımattyq kelisimin iske asyrý tetikteri talqylanǵan bolatyn.

Mınıstrdiń keltirgen málimetine qaraǵanda, 2015 jyly elimizde elektrostansalardan 91 mlrd kVt elektr energııasy óndirilgen. 2030 jylǵa qaraı bul kórsetkish elimizde 130-175 mlrd kVt-qa jetedi dep boljanady. «Bizdiń pikirimizshe, elektr energııasyn óndirýdi arttyrý parnıktik gazdar  shyǵaryndylarynyń artýyna soqtyrmaýy tıis. Bul rette birqatar sharalardy ýaqytyly qabyldaý qajet. Birinshiden, jańa tehnologııalardy engizýdi jańǵyrtý. Ekinshiden, energostansalardaǵy jańartylatyn energııa kózderi men gazdy generatorlar úlesin arttyrý qajet. Úshinshiden, energııaqamtymdylyq pen elektr energııasyn «joǵaltýdy» tómendetý», - dedi Q. Bozymbaev.