2030 jylǵa deıin uzyndyǵy 1,6 myń shaqyrym jylý jelisi jańartylady

ASTANA. QazAqparat – Indýstrııa jáne ınfraqurylymdyq damý mınıstri Qaıyrbek Óskenbaev Úkimet otyrysynda jylý júıesindegi qordalanǵan máselelerdi qalaı sheshý josparlanyp otyrǵanyn baıandady, dep habarlaıdy QazAqparat tilshisi.

«2023 - 2037 jyldar aralyǵynda jylý jelilerin kezeń-kezeńmen jańǵyrtý júrgiziletin bolady. Birinshi kezeńde, ıaǵnı 2023 jyldan 2030 jylǵa deıin uzyndyǵy 1,6 myń shaqyrym jylý jelisin aýystyrý josparlanyp otyr, bul tozý deńgeıi 75 paıyzdan asqan jeliler.

Ekinshi kezeńde, 2030-2037 jyldar aralyǵynda tozý deńgeıi 50 paıyzdan 74 paıyzǵa deıingi jylý jelilerin aýystyrý josparlanýda. Mundaı jelilerdiń uzyndyǵy 3,7 myń shaqyrymdy quraıdy.

Tozý deńgeıi 50 paıyzdan tómen jelilerdi tabıǵı monopolııalar sýbektileriniń ınvestıtsııalyq baǵdarlamalary sheńberinde aýystyrý usynylady.

Qazirgi tańda eń aldymen jergilikti atqarýshy organdar jobalaý-smetalyq qujattamany ázirlep, ýákiletti organnyń qaraýyna bıýdjettik ótinimdi engize otyryp, jylý jelileriniń jaı-kúıine tehnıkalyq tekserý júrgizýi qajet», - dedi vedomstvo basshysy.