2030 jylǵa deıin qoǵamdyq kólikter ekologııalyq taza janarmaıǵa aýystyrylady
NUR-SULTAN. QazAqparat – QR Indýstrııa jáne ınfraqurylymdyq damý birinshi vıtse-mınıstri Qaıyrbek Óskenbaevtyń aıtýynsha, 2030 jylǵa deıin qaladaǵy qoǵamdyq kólikter ekologııalyq taza janarmaıǵa aýystyrylady, dep habarlaıdy QazAqparat tilshisi.
«2018 jyldan bastap Eýro-5 ekologııalyq standarqa aýystyryldy. Jergilikti atqarýshy organdarymen birlesip, 2030 jylǵa deıin barlyq qalalyq jolaýshylar kóligin ekologııalyq taza janarmaıǵa aýystyrýǵa qajetti jumystar júrgizilip jatyr. Avtokólik quraldarynyń normatıvtik tehnıkalyq jaı-kúıin jáne zııandy zattar shyǵaryndylary normalaryn saqtaý úshin tehnıkalyq tekserý ortalyqtarynyń jáne kólik ıeleriniń tehnıkalyq tekserýden jalǵan ótkeni úshin jaýapkershiligin kúsheıtý jumysy júrip jatyr», - dedi ol Úkimet otyrysynda.
Vıtse-mınıstrdiń málimeti boıynsha, 2025 jylǵa deıin barlyq tehnıkalyq normatıvter halyqaralyq standartqa sáıkestendirilip, qabyldanǵan sharalar 2030 jylǵa deıin júk kóliginiń keminde 30% jáne jeńil kólikterdiń shamamen 70% ekologııalyq taza janarmaıǵa aýystyrýǵa múmkindik beredi.
Sondaı-aq, úkimet otyrysynda Qaıyrbek Óskenbaev ónerkásip alpaýyttarynyń ekologııalyq sharalarǵa qansha qarjy jumsaıtynyn aıtty.
