2030 jylǵa deıin Qazaqstannyń teń jartysy gazben qamtylady

ASTANA. QazAqparat - QR Energetıka mınıstri Qanat Bozymbaev 2030 jylǵa deıin halyqtyń 56%-ynyń gazben qamtylatynyn málimdedi, dep habarlaıdy QazAqparat tilshisi.

Mınıstrdiń aıtýynsha, jyl sońyna deıin 8 joba júzege asyrylyp, Qazaqstannyń túrli óńirlerindegi 11 eldimekenge gaz jetkiziledi.

"2017 jyly respýblıkalyq bıýdjet esebinen 8 jobany júzege asyrý jumystary aıaqtalady, bul Batys Qazaqstan, Jambyl, Ońtústik Qazaqstan, Aqtóbe oblystaryndaǵy 11 eldimekendi (shamamen 30 myń adam) gazdandyrýǵa múmkindik beredi. Bizdiń boljamǵa sáıkes, 2030 jyly halyqty gazdandyrý deńgeıi 56%-ǵa jetedi", - dedi Qanat Bozymbaev Ortalyq kommýnıkatsııalar qyzmetinde ótken baspasóz máslıhatynda.

Sondaı-aq, mınıstr eldi gazben qamtamasyz etý jumystarynyń kezeń-kezeńimen júzege asyp keletinin jáne sońǵy 10 jylda 8 mıllıonnan astam adamnyń nemese halyqtyń 46,3%-ynyń gazben qamtylǵanyn atap ótti.