2030 jylǵa deıin egistik jerlerdiń 15 paıyzy sý únemdeıtin tehnologııaǵa kóshiriledi

ASTANA. QazAqparat - Prezıdenttiń Joldaýynda kórsetilgen maqsattardy iske asyrý boıynsha 2030 jylǵa deıin egistik jerlerdiń 15 paıyzy sý únemdeıtin tehnologııaǵa kóshiriledi. Bul týraly búgin Ortalyq kommýnıkatsııalar qyzmetinde ótken brıfıngte «Aýyl sharýashylyǵyn qarjylaı qoldaý qory» AQ basqarma tóraǵasy Narmuhan Sarybaev málim etti.

Onyń aıtýynsha, Elbasy óz Joldaýynda rentabeldigi tómen daqyldardy óńdeýden kókónis, maıly daqyldar men jemshóp óńdeýge kóshý qajettiligin aıtady. Osyǵan baılanysty «Aýyl sharýashylyǵyn qarjylaı qoldaý qory» AQ kókónis ósirý baǵytynda fermerlerdiń kooperatsııalaý mehanızmderin paıdalanyp, tamshylatyp sýarý júıelerin satyp alý, otbasylyq jedel alma baqshalaryn damytýǵa arnalǵan nesıeleý baǵdarlamasyn ashyp otyr.

«Ózderińizge belgili, búginde elimizde sý únemdeıtin tehnologııalar az paıdalanylady. Degenmen, Prezıdenttiń Joldaýynda kórsetilgen maqsattardy iske asyrý boıynsha 2030 jylǵa deıin egistik jerlerdiń 15 paıyzyn osyndaı sý únemdeıtin tehnologııalarǵa kóshirýimiz qajet», - dedi ol.

Onyń aıtýynsha, óz qyzmetiniń aıasynda Qor aǵymdaǵy jyly egisitik jerlerdiń 1000 gektarynda tamshylatyp sýarý júıelerin engizýdi josparlaǵan. Bul baǵyt jańa tehnologııalardy paıdalanatyn fermerlerge ónim kólemin 1,5-2 esege kóbeıtýge múmkindik beredi.

«Álem boıynsha almany eń iri óndirýshiler - Qytaı, Polsha, Italııa tárizdi elder paıdalanatyn tehnologııalardy engizý boıynsha bizdiń bastamamyz otandyq alma ósiretin sharýashylyqtarǵa da jańa serpin beredi dep senemin. Búgingi tańda álemdegi almanyń 48,4 paıyzyn qytaı ósirip, 2002 jyldan bul saladaǵy tıimdiligin eki esege deıin kóterdi. Elimizde mundaı kórsetkishke jetýge eshqandaı kedergi kórip otyrǵan joqpyn. Osy jyly Qor 100 gektarda jedeldete alma baqshalaryn ósirýge kirisedi», - dedi N. Sarybaev.