2030 jylǵa deıin áskerı tehnıkany jańartý josparlanyp otyr
«Qarýly kúshterdi qarý-jaraqpen jáne áskerı tehnıkamen jaraqtandyrý áskerlerdiń jaýyngerlik ázirligin qamtamasyz etý jónindegi júktelgen mindetterge sáıkes basymdyq boıynsha júzege asyrylady. Bul máselede qorǵanys ónerkásibi keshenine eleýli ról júktelgen. Damyǵan otandyq qorǵanys ónerkásibi kesheni memlekettiń áskerı-ekonomıkalyq qaýipsizdiginiń negizgi quramdas bóligi bolyp tabylatyny anyq. Memlekettik josparlaý júıesine sáıkes ulttyq qaýipsizdik salasyndaǵy memlekettik saıasatty iske asyratyn negizgi qujat Ulttyq qaýipsizdik strategııasy bolyp tabylady. Ulttyq qaýipsizdik strategııasyn iske asyrý úshin Qazaqstan Respýblıkasy Prezıdentiniń 2021 jylǵy 20 tamyzdaǵy Jarlyǵymen Qazaqstan Respýblıkasy Qarýly kúshteriniń, basqa da áskerleri men áskerı quralymdarynyń qurylysy men damýynyń 2030 jylǵa deıingi tujyrymdamasynyń jańa redaktsııasy bekitildi», - dep atap ótedi mınıstr.
Onyń aıtýynsha, tujyrymdama Qarýly kúshterdiń tehnıkalyq jaraqtandyrylýyn arttyrý úshin naqty mindetter men kórsetkishterdi, iske asyrý kezeńderin qamtıdy. Sonymen qatar Prezıdenttiń 2018 jylǵy 28 mamyrdaǵy Jarlyǵymen bekitilgen Qazaqstan Respýblıkasynyń Qarýly kúshterin, basqa da áskerleri men áskerı quralymdaryn qaıta jaraqtandyrýdyń jáne qorǵanys ónerkásibi keshenin damytýdyń 2030 jylǵa deıingi tujyrymdamasy qoldanylady. Osy tujyrymdamamen Qazaqstan Respýblıkasynyń Qarýly kúshterin, basqa da áskerleri men áskerı quralymdaryn qaıta jaraqtandyrý múddesinde qorǵanys ónerkásibi keshenin damytýdyń maqsattary men mindetteri, negizgi baǵyttary men kezeńderi aıqyndalǵan.
«Qurylys tujyrymdamasynyń is-sharalaryn is júzinde iske asyrý maqsatynda 2030 jylǵa deıin Qarýly kúshterdi jańa, kúrdeli jóndelgen jáne jańǵyrtylǵan qorǵanys ónerkásibi keshenimen qaıta jaraqtandyrý jospary ázirlendi jáne ony 2021 jylǵy 30 qyrkúıekte Qorǵanys mınıstri bekitti. Jospar qazirgi zamanǵy jańa qorǵanys ónerkásibi keshenine qaıta jaraqtandyrýdyń qajetti qarqynyn, sondaı-aq Qarýly kúshterdiń jaýyngerlik jáne tehnıkalyq ázirliginiń talap etiletin deńgeıin qamtamasyz etetin Qarýly kúshterdiń naqty qajettilikterin eskere otyryp ázirlendi. Jospar otandyq qorǵanys ónerkásibi keshenin damytý men júkteýdi josparlaý úshin Indýstrııa jáne ınfraqurylymdyq damý mınıstrligine joldandy. Qorǵanys ónerkásibi keshenin damytýdyń basty quraldarynyń biri memlekettik qorǵanystyq tapsyrys bolyp tabylatynyn atap ótý mańyzdy», - dedi Rýslan Jaqsylyqov.
