Fýtboldan álem chempıonatyna qatysýshylar sany 64 komandaǵa deıin artýy múmkin
ASTANA. KAZINFORM — FIFA prezıdenti Djannı Infantıno 2030 jylǵy álem chempıonatyna qatysatyn quramalar sanyn 48-den 64-ke deıin ulǵaıtý múmkindigi talqylanatynyn málimdedi, dep jazady AlJazeeraRussia.
Onyń pikirinshe, bul shaǵyn memleketterge fýtboldy damytýǵa jáne týrnırge joldama alý úshin kúresýge qosymsha múmkindik beredi.
Infantıno qazirgi 48 quramadan turatyn formattyń úlken jetistikke aınalǵanyn atap ótip, barlyq qurlyq ókilderiniń joǵary deńgeıdegi oıyn kórsetip jatqanyn aıtty.
Ol álem chempıonaty tek Eýropa men Ońtústik Amerıkanyń artyqshylyǵy emes, jahandyq fýtbol merekesi bolýy tıis ekenin jetkizdi.
Qatysýshylar sanyn 64 komandaǵa deıin arttyrý 2030 jylǵy álem chempıonatynyń logıstıkasyna ózgeris engizýi múmkin. Mundaı jaǵdaıda Ýrýgvaı, Argentına jáne Paragvaı árqaısysy bir match qana emes, tórt quramadan turatyn tolyq toptyq kezeń oıyndaryn qabyldaı alady.
Túpkilikti sheshimdi qazirgi álem chempıonaty aıaqtalǵannan keıin FIFA-nyń tıisti komıtetteri qabyldaıdy.
Osydan buryn FIFA fýtboldan álem chempıonatynyń fınaly ótetin alańnyń shóbin 390 eýrodan satýdy josparlap otyrǵany habarlandy.
Álem chempıonatynyń jartylaı fınalyndaǵy oıyndar qaı telearnadan kórsetiletinin silteme arqyly kóre alasyz.
