Jasandy ıntellektiniń jahandyq ekonomıkaǵa úlesi 20 trln dollarǵa jetedi – Bektenov

ALMATY. KAZINFORM – Jasandy ıntellekttiń jahandyq modeli básekege qabilettiden kooperatsııaǵa jyldam aýysyp jatyr. Bul týraly Digital Almaty 2025 tsıfrlyq forýmy barysynda QR Premer-mınıstri Oljas Bektenov aıtty.

Oljas Bektenov 2030 jylǵa qaraı jasandy ıntellekttiń jahandyq ekonomıkaǵa qosatyn úlesi 20 trıllıon dollarǵa jetetinin atap ótti.

– Jetekshi IDC saraptama kompanııasynyń zertteýlerine sáıkes, 2030 jylǵa qaraı jasandy ıntellekttiń jahandyq ekonomıkaǵa qosatyn úlesi 20 trıllıon dollarǵa jetedi. Sonymen qatar, tek qana AI arqasynda jalpy ishki ónimniń jyl saıyn 2-3% ósýin qamtamasyz etýge bolady. Bul múmkindikti elderimizdiń ekonomıkasyn damytý úshin paıdalaný kerek,– dedi Úkimet basshysy.

Sondaı-aq ol jasandy ıntellekttiń álemde aıtarlyqtaı taralýyna yqpal etetin úsh negizgi aspektini atady.

– Birinshisi – adamı kapıtaldy damytý. Jasandy ıntellekttiń jahandyq modeli básekege qabilettiden kooperatsııaǵa jyldam aýysýda. Osy maqsatqa jetý úshin IT salasynyń álemdik kóshbasshylary birigip, ǵylymı jobalaryn birlesip júzege asyrýdy qolǵa aldy. Belgili platformalarda entýzıastar ózderiniń jobalarymen ashyq bólisedi. Olar muny jalpy tehnologııalyq damý úshin jasaıdy. Biz bul tájirıbeni ózimizdiń jáne birlesken jobalarymyz úshin paıdalanýymyz kerek, – dedi Oljas Bektenov.

Aıta keteıik, Digital Almaty forýmynda Belarýs, Qazaqstan, Qyrǵyzstan, Reseı jáne Armenııannyń úkimet basshylary tsıfrlyq jobalar kórmesimen tanysyp, plenarlyq sessııaǵa qatysyp jatyr.

Digital Almaty halyqaralyq tehnologııalyq jetinshi forýmynyń ereksheligi - ol jasandy ıntellektige arnalǵan.

Eske salaıyq, Almatyda Digital Almaty-2025 tsıfrlyq forýmy ótip jatyr. Oǵan 40 myńnan asa adam qatysýda.