2030 jylǵa qaraı sý únemdeý tehnologııasy qoldanylatyn alqap 1,3 mln gektarǵa jetedi – mınıstrlik
ASTANA. KAZINFORM – Elimiz sý únemdeý tehnologııalaryn engizýdi jedeletip, taıaý jyldary olardy qoldaný aıasyn aıtarlyqtaı keńeıtedi. Bul týraly Óńirlik ekologııalyq forým barysynda Sý resýrstary jáne ırrıgatsııa mınıstrliginiń Jerasty sýlary departamenti Jerasty sýlarynyń memlekettik monıtorıngi jáne sýarmaly jerlerdiń melıoratıvtik jaǵdaıy basqarmasynyń basshysy Lázzat Zııabekova aıtty
Onyń aıtýynsha, klımattyń ózgerýi men sý resýrstary tapshylyǵynyń artýy jaǵdaıynda sý únemdeý negizgi baǵyttardyń birine aınalýda.
- Klımattyń qubylmalylyǵy jáne sý tapshylyǵynyń ósýi jaǵdaıynda sý resýrstaryn barynsha tıimdi paıdalaný mańyzdy. Bul turaqty damýdy qamtamasyz etedi,. Bul rette negizgi nazar sýdyń eń iri tutynýshysy retinde aýyl sharýashylyǵyna aýdarylady, — dep atap ótti Lázzat Zııabekova.
Basqarma basshysynyń dereginshe, qazirgi tańda elimizde sý únemdeý tehnologııalary engizilgen alqap kólemi 500 myń gektardan asty. Tek sońǵy bir jylda ósim 150 myń gektardan asty. Bul burynǵy qarqyndardan áldeqaıda joǵary.
- 2030 jylǵa qaraı bul kórsetkishti 1,3 mln gektarǵa jetkizý josparlanyp otyr. Bul 2,2 mlrd tekshe metrge deıin sýdy únemdeýge múmkindik beredi. Osy maqsattarǵa qol jetý úshin memlekettik qarjylandyrý aıtarlyqtaı artty. Sondaı-aq ekonomıkalyq yntalandyrý sharalary engizilýde. Atap aıtqanda, utymdy sý paıdalanýdy qalyptastyrýǵa baǵyttalǵan tarıftik saıasat jetildirilýde, — dedi ol.
Lázzat Zııabekovanyń atap ótýinshe, sý únemdeý tek tehnologııa engizýmen shektelmeıdi. Bul — tutyný mádenıetin ózgertý. Mınıstrlik sýdy uqypty paıdalanýdy qalyptastyrýǵa baǵyttalǵan bilim berý bastamalaryn ásirese jastar arasynda júzege asyryp keledi.
Buǵan deıin elimizde sý únemdeý tehnologııalary qandaı nátıje bergenin jazǵan edik.
